Është përcjellë për në banesën e fundit 37-vjeçarja shqiptare Vera Myrtaj, e cila u vra në Itali, bashkë me partnerin e saj Flonino Merkuri. Vrasja e tyre u krye nga ish-bashkëshorti Viron Karabollaj, në shtëpinë e saj në Spinea të vendit fqinj.
Mes lotësh, familjarët dhe miqtë i kanë dhënë lamtumirën e fundit të resë fatkeqe, ndërsa sipas mediave italiane, lutjet janë bërë në gjuhën shqipe.
Mbi varr u vendosën kurora, dedikime dhe një fotografi e Verës, ku mbishkrimi ishte: “Mendja kujton atë që zemra nuk harron”. Në varreza ka mbërritur edhe kryetarja e bashkisë së Spinea, Martina Vesnaver, për të bërë homazhe për viktimën e krimit të tmerrshëm.
“Nuk mund të mos ishim atje. Duhet bërë gjithçka që kjo ngjarje të mos përsëritet”, thanë disa nga fqinjët e Verës.
Kujtojmë se ngjarja e rëndë ndodhi rreth dy javë më parë, ku ish-bashkëshorti i saj u fut në banesën e Verës, duke lënë të vdekur atë dhe partnerin e saj 23-vjeçar, po nga Shqipëria. Autori, 41-vjeç, më pas u gjet i vetëvrarë nga policia. Dyshohet se shkak i krimit të rëndë ishte fakti që ish-burri nuk pranonte lidhjen e re që Vera kishte krijuar.