• |
ide | kryesore

Hill: Kthimi i forcave serbe në Kosovë, mbetet çështje politike

-Instant, Arkiva, Lajme, Të fundit
hill


Ambasadori amerikan në Beograd, Christopher Hill thotë se Qeveria e Serbisë ka të drejtë t’i drejtohet KFOR-it me kërkesën që forcat serbe të sigurisë të kthehen në Kosovë. Por sipas tij, kjo është çështje politike, prandaj edhe kërkon zgjidhje politike, transmeton agjencia e lajmeve Beta. Gjatë një vizite në Nish ai ka theksuar se nuk sheh mundësi të zgjidhjes ushtarake.

“Ajo që duhet të bëjmë është që ta qetësojmë situatën, të krijojmë paqe dhe stabilitet në atë vend, ashtu që njerëzit që jetojnë atje të kenë pritshmëri të qarta se si do të duket jeta e tyre në të ardhmen. Kjo gjë mund të arrihet përmes themelimit të Asociacionit të komunave me shumicë serbe”, – tha Hill.

Ambasadori shtoi se i dërguari amerikan për Ballkanin Perëndimor, Gabriel Escobar, gjatë vizitës së tij në Beograd, e bëri të qartë se kjo është diçka që do të ndodhë, në mënyrë që njerëzit të kenë një pasqyrë të qartë se si do të jetojnë në të ardhmen në vendet ku kanë qenë prej shekujsh.

“Kjo do të krijojë kthim në normalitet, përmes të cilit do të arrihet stabiliteti në vendet ku jetojnë ata njerëz”, tha Hill.

Escobar, në një intervistë për Radion Evropa e Lirë, më 13 dhjetor, ka deklaruar se Asociacioni do të formohet, se SHBA-ja do të jetë pjesë e procesit, dhe se aty duhet të përfshihet Qeveria e Kosovës. Sipas tij, në rast se Qeveria e Kosovës nuk do që të jetë pjesë e procesit për formimin e Asociacionit , atëherë për këtë do të diskutohet me “partnerë alternativë”.

Ai ka thënë po ashtu se Kosova ka garanci shumë të forta të sigurisë nga SHBA-ja, dhe se shteti i tij kundërshton dhe e refuzon në mënyrë kategorike kërkesën e Serbisë për kthimin e forcave të saj në Kosovë.

Presidenti i Serbisë, Aleksandar Vuçiq, tha më 12 dhjetor se Qeveria e Serbisë do t’i dërgojë kërkesë komandantit të misionit të NATO-s në Kosovë, KFOR, për të dërguar deri në 1 mijë forca të sigurisë në Kosovë. Lideri serb pretendoi se sipas Rezolutës 1244 të Këshillit të Sigurimit të Kombeve të bashkuara, Serbia ka të drejtë të kthejë forcat e saj në Kosovë.

Me këtë paralajmërim, ai iu përgjigj pranisë së shtuar të Policisë së Kosovës në pjesën veriore të vendit, e cila është e banuar me shumicë serbe. Deri te kjo situatë erdhi një muaj pasi serbët në veri u larguan nga institucionet e Kosovës.

Kryeministri i Kosovës, Albin Kurti, ka deklaruar se me paralajmërimet për dërgimin e trupave, Serbia po “kërcënon me agresion” Kosovën. Ndërkaq, presidentja e Kosovës, Vjosa Osmani, ka thënë se territorin e Kosovës nuk do të ketë më kurrë policë dhe ushtarë të Serbisë.

Tensionet mes Kosovës dhe Serbisë janë rritur ditëve të fundit, teksa serbët lokalë më 10 dhjetor ngritën barrikada në veri të Kosovës. Ata po kundërshtojnë arrestimin e ish-policit të Kosovës, Dejan Pantiq. Shtetet e Bashkuara kanë bërë thirrje për largimin e barrikadave, ndërkaq Bashkimi Evropian ka kërkuar nga Kosova dhe Serbia t’i kthehen dialogut. /REL


7 Comments

  1. Sa te kemi ate lopen 100kg dhe ate bariun me fyell hic mos keni merak.
    Ju amerikanet vetem na mbroni se politiken e makaronave e bejme vehte.

      1. Ka disa . Ato vende qe jane federata me etni te ndryshme. Zvicra, Belgjika etj .
        Per aq kohe sa ne marrveshjet e nenshkruara me pare eshte pranuar qe Serbia mund te dergoje trupa ne veri te kosoves per te mbrojtur minoritetin serb aty, Serbia ka te drejte ti kerkoj KFORIT ti dergoj ato trupa. Per aq kohe sa eshte nenshkruar ( pranuar) ne marrveshjet e me parshme se Serbet mund te krijojne nje bashkesi etnike , ata do ta kerkojne ate gje deri ne fund.
        Pra ngado qe ta levizesh prpanicen ne karrige, prap ne gozhde do te te bjeri.

        Ideja e shkembimit te teritoreve , me kushtezimin e njohjes reciproke ishte ( dhe eshte ) ideja me mire per zgjidhjen e ketij prolbemi. Perndryshe , gjithomen , sherr dhe shamata do kesh me serbet ne kosove.
        Hashimi nuk ishte as tradhetar, as i shitur , as antikombetar, por njeri me vizjon dhe largpames.

      2. Kurti kur mori pushtetin premtoi qe ato gjera qe kerkonte Serbia per Serbet e Kosoves , do te kerkonte dhe kosova per shqiptret e lugines. Premtim idiot , sepse , nuk ka asnje marrveshje midis Serbise dhe Komunitetit nderkombetar per kete ceshtje.
        Kurti me kete premtim fitoi zgjedhjet dhe nuk e permend me se e di qe nuk ka asnje baze ligjore ( marrveshje ) .

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *