Mes dy skuadrave zbulim të kampionatit nuk ka fitues, në përballjen e javës së 16 të Superiores. Egnatia ndalet 1-1 nga Erzeni në Rrogozhinë, në një ndeshje të përfunduar me polemika. Një gol i anulluar me VAR për secilën skuadër, që ka lënë të pakënaqur të dy teknikët Duro e Kapllani.
Pjesa e parë e takimit u mbyll e qetë, me shumë pak raste nga të dyja skuadrat. I gjithë zhvillimi i ndeshjes ndodhi në 45 minutat e dyta, ku brenda 12 minutash u shënuan 4 gola, dy nga të cilët të anulluar. Të parët që kaluan në avantazh ishin rrogozhinasit, që realizuan me Jackson nga pika e bardhë e penalltisë në minutën e 55’. Avantazhi zgjati vetëm tre minuta, sepse Sadiki ndëshkoi vendasit me një goditje të saktë me kokë.
Në minutën e 61’, ishte sërish Xhekson ai që gjeti rrjetën për rrogozhinasit, por goli nuk vlen. Ndërhyrja e VAR anuloi festën e sulmuesit pas një faulli të shkaktuar në fillimin e aksionit. I tërbuar Duro, që kapet me arbitrin e ndeshjes Kridens Meta: “Kam dyshime për golin e anuluar pasi tani e pashë me qetësi dhe për mendimin tim nuk ishte faull. Nuk e mendoj dot si mund të anulohet ai gol me atë faull në mesfushë që nuk ishte faull, se nuk isha i qartë gjatë ndeshjes. Ajo ishte një prekje e lehtë, nuk diskutohet fare për mua që nuk ishte faull. E cuam ndeshjen 2-1 por nuk na lejoi arbitri të fitonim, pasi me skuadrën jam shumë i kënaqur”, tha Duro.
EDHE ERZENI I PAKËNAQUR ME ARBITRIMIN
Të pakënaqur edhe shijakasit, që shënuan me Alan, golin që do të kishte qenë ai i 1-2. Sërish ndërhyrja e VAR anuloi golin, këtë herë për një pozicioni të parregullt: “Unë kam qenë pak larg – tha tekniku i Erzenit Xhevahir Kapllani -. Aty ishte përgatitësi atletik duke stërvitur lojtarët. E kur e pashë që lojtari i Egnatias u shtri vetë, më bëri me shenjë që nuk ishte penallti. Po ia lëmë në dorë gjyqtarit, ai dhe VAR mund të vepronin ndryshe. Po pak rëndësi ka, ndeshja mbaroi dhe rezultati është ai që është”. Kështu Egnatia ngjitet në vendin e tretë me 25 pikë, po aq sa dhe Vllaznia, ndërsa Erzeni qëndron në vendin e 5-ë me 23 pikë.