Dueli mbijetesë shkon për Teutën, që në javën e 16 të kampionatit i largohet vendit të fundit të renditjes. 2-0 imponohen durrsakët përballë Kastriotit, në një ndeshje që nuk mund t’i shpëtonte polemikave. Tekniku i krutanëve Ardian Mema ka akuzuar hapur arbitrin, për njëanëshmëri të gjykimit në ndeshje, sidomos për administrimin e kartonëve.
Një sfidë shumë e luftuar, ashtu si ishte normale, për atë që ishte në lojë. Skuadrat kërkuan me ngulm golin, me krutanët që u shfaqën më rrezikshëm në fillimin e ndeshjes. Episodi që zhbllokoi ndeshjen dhe ishte vendimtar në verdikt u shënua në fundin e pjesës së parë. Teuta kaloi në avantazh me anë të Lorenco Vilës, duke i hapur rrugën suksesit të vendasve.
“Momente ishin ato – tha Mema pas ndeshjes -. Ndoshta momente dobësie tonat që i shfrytëzoi kundërshtari. Jam në dilemë sa i përket golit të shënuar në fund të pjesës së parë. Ishim pa ekuilibër te goli i dytë. Jam i dyzuar te pjesa e arbitrit se po të shohësh vetëm Stojanoviç është ndërprerë disa herë dhe asnjë lloj kartoni. Një e dy mund të falet, por ishte i gatshëm vetëm të nxirrte kartonë për ne. Nuk dua të merrem me arbitrat, por është e pafalshme që të ishte dora në xhep për lojtarët e Kastriotit e për Teutën nuk jepte.
MARTINI SHEH SHPËTIMIN
Teuta u mbrojt me rregull, duke lejuar pak hapësira për krutanët. Të besuarit e Edi Martinit i besuan kundërsulmit, që i shpërbleu të mbyllnin ndeshjen. Oshafi dyfishoi shifrat në pjesën e dytë, duke vendosur në kasafortë rezultatin. Një rezultat i rëndësishëm për Teutën, që sigurisht ka ende punë për të siguruar mbijetesën: “Kjo është një fitore e rëndësishme me një rival direkt – tha Martini -. Kemi punuar këto ditë, i kam bindur futbollistët e rinj që edhe ata mund të kontribuojnë për fitoren. Jam i kënaqur nga ata, jo se kisha dyshime, por kur hyn titullar direkt në një ndeshje të parë ke dhe emocione dhe mund të mos shkëlqesh”.