• |
ide | kryesore

Korporata që investon vetëm te rrogëtarët e saj

-Instant, Arkiva, Blog
ola xama



Nga viti 2019, qeveria u kujtua se nuk kishte arritur të zhvillojë si duhet ekonominë shqiptare e se duhej një kompani në pronësi të saj, që të çonte investimet në sektorët ekonomikë të cilët kishin potenciale dhe do hapnin vende të reja pune.

Me debate mes të vetëve dhe kundërshtarëve, pasi i jepte kompetenca të mëdha në administrimin e pronave shtetërore, por dhe në marrjen e huave, u miratua ligji për “Korporatën e Investimeve”.

Ligji u kthye edhe nga presidenti Meta në atë kohë, por sërish qeveria mbrojti idenë e saj për të themeluar këtë kompani. Madje nga fundi i vitit 2021, Ministria e Financave çoi edhe 17 milionë euro për këtë korporatën, që të kishte kapital të fortë. (1.8 milion i kishin dhënë ca muaj më parë)

Që kur nisi e deri më sot, të ardhurat që raporton Korporata janë zero. E vetmja gjë që gjen është një raport që ka bërë administrimi, i cili shpalos vizionin në 3 pika: të ndërtojë një ekip të mirë dhe koheziv, të zhvillojë në letër projektet dhe të sigurojë kapitalet për aktivitetet që do të bëjë.

Më pas thuhet se ka shqyrtuar dhjetëra projekte potenciale në turizëm, energji, bujqësi që të identifikojë se “cili prej tyre ushqen potencialin transformues nga këndvështrimi i qëndrueshmërisë tregtare”.

Ekipi koheziv i ekspertëve është një staf prej 4 vetash, ndërsa e gjithë puna e projekteve që ka bërë kjo ndërmarrje shtetërore shtrihet vetëm në gjetjen e një zyre. Për këtë, punonjësit kanë marrë 2 milionë lekë rrogë, ndërsa drejtori përveç rrogës ka marrë dhe 20 mijë euro honorare, ndërsa bordi ka shpërblyer veten me 80 mijë euro për punën e bërë. Nga anëtarët e bordit, njëra është drejtore e rëndësishme dhe tjetra ministre.

Si dikush që jeton në një vend të varfër, nuk mund të rri pa më bërë përshtypje se si shpërdorohen paratë publike, pasi më shumë se pagat dhe shpërblimet e derdhura kot, të dhimbsen paratë e ngrira në një kompani që nuk kryen asnjë aktivitet. 20 milionë euro për një zyrë që nuk bën asgjë, kurse këtej dilet në fushatë që qytetarët të blejnë borxhin e qeverisë!

Sa herë del ndonjë i varfër të kërkojë strehim, nuk kemi; sa herë del ndonjë fatkeq të kërkojë kurim, nuk kemi; sa herë duhet bërë ndonjë urë apo thelluar ndonjë lumë, nuk kemi, por për Korporata dhe Koncesione kemi gjithmonë.

Marre nga facebook i autores Ola Xama



1 Comment

  1. Jepjani prape voten ketyre plackitesve ne 14 maj e mbasandaj ne 15 e mbrapa ankohuni per cmimet e ushqimeve,rroga te ulta e cdo gje tjeter.Popull dele zgjohuni!

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *