Rasti i pagave, fitimet kapitale dhe ajo -15 në renditje rrezikojnë të kenë pasoja edhe në merkaton e Juventus. Sidomos në atë në dalje. Nëse për janarin është vetëm McKennie drejt largimit, lamtumirat në verë mund të jenë padyshim më të rëndësishme dhe më të dhimbshme. Pikërisht atëherë do të dihet nëse bardhezinjtë do të mund të luajnë në Champions League, apo do të detyrohen (nga UEFA apo nga rezultatet në fushë) të veprojnë si spektatorë në eventet ndërkombëtare. Në këtë rast klubi mund të detyrohet të bëjë shitje të rënda për të sistemuar llogaritë. Pa harruar se lojtarët e tij kryesorë mund të kërkojnë të shiten për të mos lënë turnetë që kanë rëndësi. Di Maria dhe Rabiot janë tashmë në muajt e tyre të fundit me fanellën bardhezi, klubet e mëdha europiane kanë hedhur sytë nga Federico Chiesa e Dusan Vlahovic.
NDËRHYRJA E BARCELONËS
Sipas mediave serbe, në fakt, qendërsulmuesi ka përfunduar në shënjestër të Barcelonës. Blaugranat po ndjekin nga afër situatat me drejtësine të Juventus. Klubi i presidentit Laporta është i gatshëm të shpenzojë rreth 80 milionë euro për të siguruar shërbimet e Vlahovic. Një shumë e rëndësishme, pavarësisht se ai nuk ka bindur që prej mbërritjes në Torino. Spanjollët e kanë konsideruar rënien e tij, veçanërisht për shkak të problemeve fizike. Katalanasit, megjithatë, i bashkohen disa klubeve të Premier League, me Chelsea përpara të gjithëve, të gatshëm edhe të luajnë me rritje cmimi.
Për momentin, Dusan betohet për dashurinë për fanellën dhe mezi pret të kthehet në dispozicion të teknikut Allegri. Serbi duhet të kthehet bashkë me Pogba për ndeshjen e së dielës kundër Monza. Qendrimi i Vlahovic, megjithatë, mund të ndryshojë, duke pasur parasysh situatën në zhvillim. Nga ana e tij, Juventus mund ta shesë sulmuesin përballë një oferte prej rreth 100 milionë euro, duke pasur parasysh se shpenzoi 70 e më shumë milionë vetëm një vit më parë.