Presidenti turk Rexhep Tajip Erdogan tha se është e rëndësishme që të arrihet paqja nëpërmjet negociatave midis Ukrainës dhe Rusisë sa më shpejt të jetë e mundur.
Duke folur në konferencën e përbashkët për shtyp me homologen e tij hungareze Katalin Novak, Erdogan tha gjithashtu se Turqia pret që Hungaria të tregojë mbështetjen për avancimin e agjendës pozitive në lidhjet Turqi-BE.
Duke përshëndetur lidhjet e gjata midis dy vendeve, Erdogan tha se “dora e ndihmës” që Hungaria i zgjati Turqisë pas tërmeteve të dyfishta shkatërruese në shkurt ishte shembulli i këtyre marrëdhënieve të forta.
Tërmetet me magnitudë 7.7 dhe 7.6 goditën 11 provinca turke, Adana, Adiyaman, Diyarbakir, Elazig, Hatay, Gaziantep, Kahramanmaras, Kilis, Malatya, Osmaniye dhe Sanliurfa, duke shkaktuar më shumë se 53 mijë viktima.
Mbi 13.5 milionë njerëz në Turqi janë prekur nga tërmetet, si dhe shumë të tjerë në Sirinë veriore.
“Ne diskutuam aspekte të ndryshme të marrëdhënieve Turqi-Hungari në takimet që mbajtëm,” shtoi ai.
”Turqia dhe Azerbajxhani janë të gatshëm të ofrojnë mbështetje për dërgimin e gazit natyror në Hungari nëpërmjet tubacionit të gazit natyror Trans Anatolian,” shtoi Erdogan.
Marrëdhëniet tregtare, ushtarake, ekonomike dhe kulturore ishin gjithashtu në axhendë në takimin mes dy liderëve, gjatë të cilit u panë pamjet nga tërmeti, theksoi Erdogan.
Ata pohuan gjithashtu vullnetin e tyre të përbashkët për të forcuar më tej lidhjet bazuar në një partneritet strategjik të zgjeruar, duke shtuar se të dy vendet ranë dakord të zhvillonin një takim të gjashtë të Këshillit të Bashkëpunimit Strategjik të nivelit të lartë në kryeqytetin hungarez Budapest në dhjetor.
Erdogan tha gjithashtu se ai dhe Novak theksuan rëndësinë e zhvillimit të bashkëpunimit midis dy aleatëve të NATO-s në industrinë e mbrojtjes.