Bashkëthemeluesi i The Script dhe kitaristi Mark Sheehan ka ndërruar jetë në moshën 46 vjeçare.
Lajmi u konfirmua nga anëtarët e grupit në rrjetin social, Instagram. “Burri, babai, vëllai, shoku i grupit dhe miku shumë i dashur Mark Sheehan ndërroi jetë sot në spital pas një sëmundjeje të shkurtër”, shkroi grupi.“Familja dhe grupi u kërkojnë fansave të respektojnë privatësinë e tyre në këtë kohë tragjike.”
Homazhet vërshuan teksa fansat e muzikantit të ndjerë vajtuan humbjen e tij të papritur. “Nuk di çfarë të them përveç se kjo po më thyen zemrën në 100000 copë. Shumë përqafime dhe dashuri për familjet dhe miqtë”, ka komentuar një person në postim. “Absolutisht zemërthyese. Një burrë vërtet i mrekullueshëm, i talentuar dhe i përulur i marrë shumë shpejt. Ndihem shumë i privilegjuar që të kam parë të performosh ndër vite. R.I.P Mark, “shtoi një fans tjetër.
Muzikanti i ndjerë bashkëthemeloi The Script me mikun e tij të fëmijërisë dhe vokalistin Danny O’Donoghue si dhe bateristin Glen Power në 2001. Grupi debutoi albumin e tij me të njëjtin emër në vitin 2008 dhe është i njohur për hitet si “We Cry”, “The Man Who Can’t Be Moved”, “Breakeven” dhe “Before the Worst”. Ata vazhduan të regjistrojnë pesë albume të tjera në studio dhe kanë shitur mbi 20 milionë albume në mbarë botën.
Vitin e kaluar, Sheehan u largua nga turneu botëror i grupit në SHBA, megjithatë, O’Donoghue konfirmoi për Sunday World se kjo ishte për shkak të angazhimeve familjare. “Është historia e tij për të treguar, por po, mendoj nëse mund të parafrazoja, fëmijët e tij kishin nevojë për një baba dhe gruaja e tij kishte nevojë për një burrë,” tha O’Donoghue. Sheehan ishte i martuar me Reena Sheehan. Ata kishin tre fëmijë./Lapsi.al