“Kur luan i fundit dhe të tjerët kanë bërë rezultatet e tyre, kjo të shton pak dëshirën, por edhe presionin. Këtë kemi kërkuar të menaxhojmë. E dinim që ishte ndeshje e rëndësishme me kundërshtar shumë të fortë. Një ndeshje mes rivalësh, komplimente skuadrës për reagimin. Ndeshja shkoi 0-1, por shpirti i sakrificës, e karakteri, bënë diferencën. Kjo skuadër nuk di të dorëzohet edhe pse nuk jemi perfekt. Kemi edhe ne gabimet tona”. Orges Shehi është i lumtur pas fitores 2-1 të Tiranës së tij përballë Egnatias. Tani titulli është më pranë dhe për më tepër edhe Kristal Abzaj është zhbllokuar. Pikërisht atëherë kur bardhebluve i duhet më shumë: “Jam shumë i kënaqur për Abazajn se e kam thënë që po na ndihmon me gjendjen që ka. Po stërvitet me sakrificë për të qenë në fushë. Me egon që ka pres sinjalin e tij kur do të dalë, e kam thënë që nuk është as në 70%. Sot tregoi që bën diferencën. Jam i lumtur që pas këtyre peripecive kthehet në lojtarin kyç tonin, duke shënuar dy gola”.
Lexo më tej: Video/ Dygolëshi i Kristal Abazaj përmbys Egnatian: Tirana vendos një dorë te titulli, +5 nga Partizani
100 ndeshje në pankinën e Tiranës, një titull kampion i fituar dhe një tjetër pothuajse. E pas triumfit në fushë kundër Egnatias, tekniku Shehi ka marrë një surprizë edhe në dhomat e zhveshjes: “Kur hyra në dhomat e zhveshjeve, lojtarët më bënë surprizë. Kam 100 ndeshje me Tiranën dhe mendoj se është arritje. E për këtë jam i kënaqur dhe i lumtur, me të gjithë bashkëpunëtorët e stafin për këtë rrugëtim. Lojtarët më dhuruan një fanellë me emrin tim me numrin 100. Patjetër që dhurata më e bukur ishte fitorja, i bëmë dhuratë vetes, mundit e djersës tonë. Kjo është dhurata më e madhe”, zbuloi Shehi.
TETOVA: “MË MIRË I KUQ SE LA ABAZAJN TË SHËNONTE”
“Në pjesën e dytë morëm një gol që lojtari mund të bënte faull dhe të ndëshkoheshe. Më mirë një i kuq, sesa e la të shkonte te goli. Më vjen keq për djemtë sepse u munduan deri në fund, por pa ja arritur qëllimit”. Edlir Tetova nuk e fsheh zhgënjimin për humbjen, që e përjashton përfundimisht nga cështja e titullit. Egnatia u dorëzua 2-1 përballë Tiranës, pavarësisht se kaloi e para në avantazh: “Më vjen keq. Sot nuk ishte një ndeshje për t’u humbur. Mbas golit të 1-1 ishte një episod kundërsulmi që mund të kishim shkaktuar faull. Do të mbroheshim me 10 lojtarë dhe nuk e di si do shkonte ndeshja. Sa i përket lojës në pjesën e dytë e kemi pasur topin nën kontroll. Megjithatë djemtë e mi dhanë maksimumin dhe unë jam shumë i kënaqur” tha Tetova.
Në lidhje me të ardhmen tekniku është i qartë: “Është viti i parë. Unë jam shumë i kënaqur me ecurinë e skuadrës. te goli i parë ishte model. Më vjen shumë mirë për djemtë, por na duhet vazhdimësi. Duhet të jemi më të fokusuar te detyrat. Kjo është një vazhdimësi e asaj kontrate që kam bërë në fillim, sepse klub i besoj te projekti që kam dhënë. Besoj që në vazhdimësi, sidomos pas këtij sezoni do të jetë një Egnatia krejt ndryshe”.