Komisioni Evropian i kundërshtoi ndalesat e vendosura nga Polonia dhe Hungaria mbi importet e grurit të Ukrainës. Dy vendet thanë se masat janë të nevojshme për të mbrojtur sektorët e tyre bujqësorë nga importet e lira.
Ndalesat vlejnë për drithërat, produktet e qumështit, sheqerin, frutat, perimet dhe mishin, dhe do të jenë në fuqi deri në fund të qershorit. Komisioni tha se nuk u takon shteteve anëtare që individualisht të bëjnë politika tregtare.
Ai tha se veprimet e njëanshme nuk do të tolerohen, por nuk specifikoi se çfarë masash do të marrë kundër Polonisë dhe Hungarisë.
“Në kohë të tilla sfiduese, është thelbësore që të koordinohen dhe të përafrohen të gjitha vendimet brenda BE-së”, tha një zëdhënës i këtij institucioni.
Shumica e grurit ukrainas eksportohet nëpërmjet Detit të Zi, por pushtimi rus, vitin e kaluar, i ndërpreu rrugët e eksportit dhe bëri që sasi të mëdha të drithërave të përfundojnë në Evropën qendrore.
Një marrëveshje me Rusinë, e ndërmjetësuar nga OKB-ja dhe Turqia, i lejon Ukrainës që t’i vazhdojë eksportet përmes detit, por Ukraina thotë se Rusia e ngadalëson procesin me anë të inspektimeve.
Polonia dhe Hungaria morën vendimin në fundjavë, pas ankesave nga fermerët vendas, të cilët thanë se po dëmtohen nga drithërat ukrainase, që shiten më lirë./REL
Jo vetëm Polonia e Hungaria, por edhe Çekia kanë marrë masa për rritjen e prodhimit vendas dhe uljen e importit për grurin e prodhimet bujqësore.
Kjo është një politikë në favor të fermerëve dhe ekonomisë së këtyre vendeve, sigurisht e ndërmarrë nga qeveri të përgjegjshme në kushtet e krizës globale dhe rritjes së pakënaqësisë në Europen perëndimore për rënien e nivelit të jetesës.
BE të mos bëhet vegël qorre për luftën në Ukrainë, por të mendojë për Europen dhe qytetarët e saj, duke përmbushur misionin për të cilin u krijua.