Juventus është në pritje të gjyqit të ri (në shkallën e parë dhe të dytë) që duhet të vendosë për 15 pikët e dënimit për çështjen e fitimeve kapitale. Bardhezinjtë megjithatë duhet të mendojnë edhe për hetimin e dytë, atë që lidhet mbi të gjitha me manovrën e pagave. Periudha e shkeljes së pretenduar është e epokës Covid, por dyshohet edhe për partneritete me klube të tjera dhe marrëdhënie me menaxherët. Deri të enjten, klubi i Juventus duhet të dorëzojë dokumentet e mbrojtjes. Më pas prokurori federal do të ketë 20 ditë për të vendosur nëse do të paraqesë apo referojë. E, në rast referimi, nëse nuk ka marrëveshje për pranimin e fajësisë, gjykata federale do të vendosë dëgjim për shkallën e parë. Ndërkohë, vetëm pasi të ketë parë dokumentet e prokurorisë, Juventus do të studiojë mbrojtjen.
LINJA MBROJTËSE E JUVENTUS
Megjithatë, siç sqaron sot Gazzetta dello Sport, nuk është e vështirë të imagjinohet linja mbrojtëse e bardhezinjve. Ajo do të bazohet në dy gurë themelorë të bërë të qartë tashmë në shënimin zyrtar: “Shoqëria beson se ka zbatuar në mënyrë korrekte standardet përkatëse ndërkombëtare të kontabilitetit. E se ka funksionuar në përputhje të plotë me parimin e ndershmërisë sportive”.
Në thelb, prokuroria akuzon Juventusin për shkelje të nenit 4 që parashikon detyrimin e ndershmërisë dhe korrektësisë sportive. Por prokuroria ka barrën e provës dhe do të duhet të demonstrojë parregullsitë e supozuara të kryera nga klubi. Juventus, ndërkohë, argumenton, siç ka bërë në të kaluarën, se ato dokumente nuk kanë asnjë vlerë ligjore. Bardhezinjtë synojnë të zhvendosin vëmendjen nga neni 4 në nenin 31, i cili ka të bëjë me shkeljet e menaxhimit. Një nen që parashikon sanksione më të buta (gjoba dhe një ose më shumë pikë penalizimi).
Lexo më tej: Uefa përgatit përjashtimin e Juventus nga kupat: në rast se hetimi zgjatet, Nyon do të vendosë vetë fatin e klubit
Prandaj, objektivi do të jetë bindja e gjykatës se dokumentet plotësuese nuk kishin vlerë detyruese. E se, nëse kishte ndonjë parregullsi, këto ishin të kufizuara në aspekte ekonomike që nuk kanë të bëjnë me rezultatet në terren. Ndër hipotezat, shpjegon Gazzetta, nuk duhet përjashtuar as ajo e marrëveshjes për pranimin e fajësisë. Ndërkohë, UEFA vëzhgon dhe pret, tani për tani.