Projekti “100 fushat” vazhdon të jetë në qendër të vëmendjes në Federatën Shqiptare të Futbollit. Komiteti i Ekzekutiv i FSHF-së zhvilloi ditën e premte mbledhjen e radhës në ambientet e Shtëpisë së Futbollit. Në këtë mbledhje u miratuan të gjithë materialet për Asamblen e Përgjithshme të Zakonshme vjetore të Federatës Shqiptare të Futbollit. Natyrisht u morën edhe vendime të rëndësishme që kanë të bëjnë me investimet në drejtim të infrastrukturës në disa qytete të vendit.
Në drejtim të infrastrukturës, anëtarët e Komitetit Ekzekutiv miratuan investimin për sistemin e aksesit dhe biletarisë në Arenën e Demave. Një element i rëndësishëm për certifikimin ndërkombëtar të stadiumit kryeqytetas. U miratua gjithashtu bashkëpunimi për ndërtimin e një fushe të re me bar natyral në Bashkinë Roskovec. E gjithat në kuadër të projektit “100 fushat”, i cili po shtrihet në të gjithë territorin e vendit.
Një tjetër vendim i rëndësishëm në mbledhjen e djeshme ishte miratimi i projektit për ndërtimin e 2 fushave të reja në qytetin e Laçit dhe sistem ndriçimi për to. Njëra fushë do të jetë me bar natyral dhe tjetra me bar artificial. Kjo për të mundësuar një përdorim më intensiv për ekipet zinxhir dhe komunitetin e zonës.
Lexo më tej: Nuk ka më spostime, FSHF përcakton kalendarin e kampionatit e Kupës: ja kur do të luhet derbi
Investimi i fundit i miratuar ishte ai për rehabilitimin e ambienteve në Qendrën Sportive Kamëz. Përveç kësaj do të bëhet edhe ndërtimi në të i një fushe të re stërvitore me bar artificial.
Katër fushat e reja që do të ndërtohen janë pjesë thelbësore e projektit të FSHF-së, “100 fushat”. Brenda vitit 2025 synohet që sëbashku me të gjithë aktorët dhe faktorët e përfshirë në botën e futbollit ti shtohen inventarit të infrastrukturës në vend 100 fusha të reja me përmasa të mëdha.