Pas Hamasit, kërcënon Hezbollahu/ A rrezikon një tjetër luftë Izraeli

Udhëheqësi i grupit militant Hezbollah, Sayyed Hassan Nasrallah paralajmëroi këtë të premte se zgjerimi i konfliktit në Lindje të Mesme është një mundësi reale. Në fjalimin e tij të parë publik që nga fillimi të luftës mes Izraelit dhe Hamasit, ai tha se përshkallëzimi i mëtejshëm i konfliktit mes Hezbollahut dhe Izraelit, varet nga ajo që do të ndodhë në Rripin e Gazës. Ai fajësoi Shtetet e Bashkuara për luftën në Gazë dhe numrin e lartë të viktimave civile dhe tha se ulja e tensioneve atje është qenësore për parandalimin e një lufte rajonale. Hezbollahu, organizatë e shpallur terroriste nga Shtetet e Bashkuara, mbështetet nga Irani.

Që kur ka filluar lufta e Izraelit ndaj Hamasit, Hezbollahu ka përshkallëzuar sulmet ndaj forcave izraelite, duke detyruar Izraelin të mbajë forca në veri, në kufi me Libanin, dhe të mos i dërgojë ato në jug, në Rripin e Gazës. Shtëpia e Bardhë tha sot se Hezbollahu nuk duhet të shfrytëzojë konfliktin në Izrael. “Shtetet e Bashkuara nuk duan që konflikti të zgjerohet në Liban,” tha një zëdhënës.

Çfarë është Hezbollahu dhe ku është Libani?

Hezbollahu është një organizatë myslimane shiite e cila ka ndikim politik dhe kontrollon forcën më të fuqishme të armatosur në Liban. Ajo u krijua në fillim të viteve 1980 nga fuqia më dominuese shiite në rajon, Irani, për t’iu kundërvënë Izraelit. Në atë kohë, forcat izraelite kishin pushtuar Libanin jugor, gjatë luftës civile të vendit. Hezbollahu ka marrë pjesë në zgjedhjet kombëtare që nga viti 1992 dhe është bërë një prani kryesore politike.

Krahu i saj i armatosur ka kryer sulme vdekjeprurëse ndaj forcave izraelite dhe amerikane në Liban. Kur Izraeli u tërhoq nga Libani në vitin 2000, Hezbollahu mori meritat për largimin e tyre. Që atëherë, Hezbollahu ka mbajtur mijëra luftëtarë dhe një arsenal të madh raketash në Libanin jugor. Ai vazhdon të kundërshtojë praninë e Izraelit në zonat e diskutueshme kufitare.

Ajo është cilësuar si organizatë terroriste nga shtetet perëndimore, Izraeli, vendet arabe të Gjirit dhe Liga Arabe. Në vitin 2006, shpërtheu një luftë e plotë midis Hezbollahut dhe Izraelit, e shkaktuar kur Hezbollahu kreu një bastisje vdekjeprurëse ndërkufitare. Trupat izraelite pushtuan Libanin jugor në përpjekje për të eliminuar kërcënimin nga Hezbollahu. Megjithatë, ai mbijetoi dhe që atëherë ka rritur numrin e tij të luftëtarëve dhe ka marrë armë të reja dhe më të mira.

Kush është lideri i Hezbollahut, Hassan Nasrallah?

Sheikh Hassan Nasrallah është një klerik shiit që ka udhëhequr Hezbollahun që nga viti 1992. Ai luajti një rol kyç në shndërrimin e saj në një forcë politike, por edhe ushtarake. Ai ka lidhje të ngushta me Iranin dhe liderin e tij suprem, Ayatollah Ali Khamenei.

Këto lidhje datojnë që nga viti 1981, kur udhëheqësi i parë suprem i Iranit, Ayatollah Ruhollah Khomeini, e emëroi atë përfaqësuesin e tij personal në Liban. Nasrallah nuk është shfaqur në publik prej vitesh, me sa duket nga frika se mos vritet nga Izraeli. Megjithatë, ai nderohet nga Hezbollahu dhe mban fjalime televizive çdo javë.

Sa të fuqishme janë forcat e Hezbollahut?

Hezbollahu është një nga forcat ushtarake joshtetërore më të armatosura në botë. Ai financohet dhe pajiset nga Irani. Sheikh Hassan Nasrallah ka pohuar se ka 100 mijë luftëtarë, megjithëse vlerësime të pavarura flasin midis 20 mijë dhe 50 mijë. Shumë prej tyre janë të stërvitur mirë dhe luftojnë fort dhe kanë luftuar në luftën civile siriane. Organizata ka rreth 130 mijë raketa sipas Qendrës për Studime Strategjike dhe Ndërkombëtare. Pjesa më e madhe e arsenalit të saj përbëhet nga raketa të vogla artilerie të tokë-tokë. Por gjithashtu mendohet se ka edhe raketa kundërajrore si dhe kundër anijeve, si dhe raketa të drejtuara të afta për të goditur thellë brenda Izraelit. Kjo organizatë është shumë më e sofistikuar se Hamasi dhe më e pajisur me mjete në dispozicion.

A mund të hyjë Hezbollahu në luftë me Izraelin?

Që nga sulmi i Hamasit më 7 tetor, Hezbollahu ka sulmuar pozicionet ushtarake në Izraelin verior. Ai ka lëshuar raketa ndaj pozicioneve izraelite, ka hedhur raketa antitank në automjete të blinduara dhe ka sulmuar objektivat ushtarake me dronë shpërthyes. Forcat e Mbrojtjes të Izraelit (IDF) janë kundërpërgjigjur, duke përdorur sulme ajrore, zjarr tankesh dhe artilerie kundër pozicioneve të Hezbollahut në Liban.

Ushtarë izraelitë, por edhe luftëtarë të Hezbollahut janë vrarë. Izraeli ka evakuuar mijëra civilë nga zona. Zëdhënësi i IDF, Daniel Hagari tha se forcat e tij ishin në “gadishmëri shumë të lartë” përgjatë kufirit verior të Izraelit. Kryeministri izraelit, Benjamin Netanyahu, ka premtuar një përgjigje të përmasave “të paimagjinueshme” nëse Hezbollahu hap një front të dytë në konflikt. ©Marrë nga VOA dhe BBC, LAPSI.al