PAMJET/ Ushtria ukrainase përparon brenda Rusisë, por synimi i paqartë

Mediat perëndimore kanë publikuar pamje të momentit kur një autokolonë me tanke ukrainase vërshon në Rusi ndërsa trupat e Vladimir Putin ngrenë flamurin e bardhë në terrenin e tyre. Pamjet tregojnë përparimin ukrainas në Kursk, duke përfshirë tanke, transportues të blinduar të personelit dhe një automjet pastrimi të minave UR-77.

Luftime të ashpra janë zhvilluar në vendbanimet Kruglenkoye dhe Kazachya Lokna, me granatime të qyteteve dhe fshatrave të tjera. Rusia ka dërguar trupa, artileri dhe helikopterë sulmues Ka-52 kundër forcave ukrainase në përpjekje për të ndaluar përparimin e tyre të befasishëm, i cili filloi të martën.

Pamjet duket se tregojnë dhjetëra ushtarë të Putinit duke hedhur armët e tyre dhe duke u dorëzuar në vendin e tyre – në një poshtërim masiv për diktatorin. Ukraina thotë se ka kapur rreth 300 rusë, teksa forcat e Kievit kanë depërtuar pothuajse 20 milje brenda Rusisë, sipas disa raportimeve. Midis robërve janë trupa nga Brigada 225 Sulmuese e Rusisë, të paraqitur në pamje me duar të lidhura, të shtrirë në një rrugë.

Një tjetër video pretendon se tregon skuadrat e robërve që ecin në një rresht dhe të shoqëruar nga rojet e tyre të reja ukrainase. Shumë të tjerë raportohet se janë larguar nga pozicionet e tyre pasi gjendja e jashtëzakonshme u shpall në Kursk të mërkurën në mbrëmje. Por shefi ushtarak rus Valery Gerasimov këmbëngul se inkursioni është ndalur.

Shefi i Shtabit të Përgjithshëm të Rusisë tha se rreth 1000 ushtarë ukrainas ishin përfshirë në sulm, të udhëhequr nga Brigada e 22-të e Mekanizuar e Kievit. Synimet e sakta të Ukrainës nuk janë të qarta, por disa nga pala ruse kanë frikë se ata mund të përpiqen të kapin termocentralin bërthamor të Kurskut.

Mijëra rusë po evakuohen nga rajoni mes ankesave se forcat e armatosura dhe të sigurisë të Putinit nuk kanë arritur t’i mbrojnë. Qyteti i Sudzha është nën kontrollin e pjesshëm të Ukrainës dhe pothuajse i rrethuar nga forcat e tij. 

Miku i afërt i Putinit dhe ish-presidenti Dmitry Medvedev i kërkoi sot Rusisë të përgjigjet duke pushtuar të gjithë Ukrainën. Tashme sipas tij është “e nevojshme” që të “mposhtej dhe shkatërrohej pa mëshirë armiku” dhe të organizohej një pushtim total.

“Që tani e tutje, (lufta) duhet të fitojë një karakter të hapur ekstraterritorial. Ky nuk është më vetëm një operacion për të kthyer territoret tona zyrtare dhe për të ndëshkuar nazistët (ukrainas). Ne mund dhe duhet të shkojmë në tokat e Ukrainës ende ekzistuese – në Odesa, në Kharkiv, në Dnipro, në Mykolaiv (të gjitha qytetet që tani mbahen nga Ukraina).

Nuk duhet të ketë kufizime në kuptimin e disa kufijve të Rajhut të Ukrainës të njohur nga askush. Dhe tani ne mund dhe duhet të flasim për këtë hapur, pa siklet. Të gjithë, përfshirë edhe anglezët b*******, le ta kuptojnë këtë: do të ndalemi vetëm kur ta konsiderojmë të pranueshme dhe të dobishme për veten tonë” – deklaroi Medvedev.

Kanalet e telegramit me lidhje me Ministrinë e Mbrojtjes së Rusisë thanë se forcat ukrainase pushtuan fshatrat Nikolaevo-Darino, Sverdlikovo dhe Oleshnya dhe kanë siguruar baza të forta në këto zona kufitare. Fshati më i largët që pretendohet se është pushtuar është rreth 4 kilometra brenda Rusisë nga kufiri ndërkombëtar. Raporte të tjera pretendojnë se trupat ukrainase kanë avancuar gjithashtu në Gogolevka dhe Goncharovka brenda Rusisë. Ukraina ende nuk ka komentuar mbi këto lëvizje.

Ushtria ruse pranoi se Ukraina kishte dërguar tanke dhe automjete të blinduara luftarake përtej kufirit verilindor më 6 gusht në një “sulm masiv”. Është i njëjti rajon që rebelët mbështetës të Ukrainës sulmuan në një sulm të dyfishtë në mars. Luftimet janë përqendruar në fshatra të vegjël përtej kufirit të ruajtur lehtë. Pamjet e postuara të sulmeve në mediat sociale treguan avionë luftarakë që gumëzhinin mbi një autostradë, helikopterë rusë të shkatërruar dhe kamionë të djegur.

Ukrainasit shkatërruan gjithashtu dy helikopterë sulmues rusë. Ministria e Mbrojtjes e Rusisë pretendoi fillimisht se sulmi ishte zmbrapsur në një deklaratë në Telegram, por më vonë e fshiu. Moska, e cila bombardon çdo ditë civilët dhe territorin ukrainas, e quajti ofensivën ushtarake një “sulm terrorist”. Një Putin i poshtëruar e cilësoi sulmin në rajonin e Kurskut si një “provokim të madh”.

Ushtria ruse publikoi pamjet e goditjeve ndaj automjeteve të Ukrainës që përparonin, duke përfshirë shkatërrimin e një sistemi raketash tokë-ajër brenda Ukrainës. Ofensiva e fundit ndërkufitare po shihet si sulmi më i madh i Kievit në territorin rus në disa muaj. Rusia po shton përforcimet, por edhe Ukraina. Dihet tashmë se Ukraina ka nën kontroll stacionin kryesor të matjes së gazit Sudzha, i cili përdoret si transit për në Evropë përmes Ukrainës.

Rusia ka dërguar një gjeneral në rajonin e Kurskut – gjeneralmajor Apty Alaudinov, komandant i forcave speciale Akhmat (çeçene) – i cili u zotua të mposhtë ukrainasit. “Armiku ka hyrë në territoret kufitare. Disa vendbanime janë të pushtuara nga armiku. Ai po përpiqet të përparojë sa më shumë që të jetë e mundur, duke ndërtuar të gjitha forcat e tij, të cilat i ka lëvizur nga kufiri Bjellorusi” –tha ai. ©The Sun, LAPSI.al