Tashmë është zyrtare, “Dancing 6” pritet të nisë në mes të Tetorit. Ashtu siç ndodh rëndom, lajmet e para që shoqërojnë daljen e programit në transmetim, flasin për të ashtuquajturit “stars”, kasti që do të kërcejë gjatë netëve të sezonit. E me sa duket, yjet që do të përballen në spektakël këtë vit, nuk kanë aq shkëlqim në botën ku bëjnë pjesë. Ndryshe nga vitet e shkuara, yjet e shndritshëm të showbiz-it shqiptar, nuk figurojnë në listën e programit që shpesh është akuzuar për mashtrime me çmimin e parë.
Niko Komani, Albatros Rexha, Rovena Dilo, Art Abazi, Suela Konjari, Young Zerka, Dorina Mema, Beatrix Ramosaj, Florian Agalliu, Mitro Çela, Ambra Meda, Adrola Dushi janë emrat e sivjetshëm, gjysmat e të cilëve, publiku i gjerë nuk i njeh ose i ka dëgjuar shumë pak, e ndoshta nuk ka interes t’i shohë duke kërcyer.
Vezullimi i shfaqjes, atmosfera dhe energjia e domosdoshme për këtë program, duket e pamundur të arrihet, po të kemi parasysh edhe “gjetjen” e prezantuesve që pritet të debutojnë në versionin shqiptar të patentës së BBC.
Me ëmbëlsinë që e karakterizon, Ami Toska, mbetet një nga moderatoret më të spikatura të garës së kërcimit. Këtë sezon, Borëbardhës së ekranit i bashkëngjitet dyshja e prezantuesve të programeve për të rinj në MAD Tv. Mateo dhe Rudi pritet të shfaqen përkrah Amit në spektaklin e përfolur të Vizion +, më datë 15 tetor. A do të arrijë 12-shja e yjeve, të mbërthejë përpara ekranit teleshikuesit? Mbetet për t’u parë!