Skënderbeu ka arritur të dalë me 3 pikë nga përballja me Korabin në “Elbasan Arena”. Korçarët ia dolën të fitojnë me anë të një penalltie të shënuar nga Hamdi Salihi në minutën e 66-të. Me këtë fitore, Skënderbeu arrin në kuotën e 38 pikëve, duke u bashkuar me Partizanin në vendin e dytë me pikë të barabarta. Ndërsa Korabi mbetet me 11 pikë në vendin e fundit. Por ajo që ka nxitur polemikat ka qenë penalltia e dhënë për korçaret.
Trajneri i dibranëve Gerd Haxhiu ka hedhur një lumë akuzash në drejtim të arbitrit.
“Qesharake. Është qesharake, nuk ka kontakt, nuk është se po pretendojmë se ka kontakt, nuk merrem me drejtimin e topit. Lojtari i Skënderbeut ka humbur ekuilibrin. Nuk e kuptoj pse i bën federata ato takime me kapitenët e gjyqtarët. Kapitenët tanë kanë qenë korrektë dhe gjykimi na penalizon. Nuk e di çfarë mund të bëjmë ne. Nuk ka vend për koment, jemi skuadër modeste, nuk tolerojmë, po bëjmë futbollin më korrekt të mundshëm. E përsëris, gjyqtar bastard” – tha Haxhiu.
Ndryshe mendon trajneri i Skënderbeut Ilir Daja.
“Është pozicion i vështirë. Topin e ka Sabieni, ka kontakt brenda zonës, mbrojtësi zgjat këmbën, ndaj mendoj që është penallti” – tha Daja.