Trajneri i Tiranës, Mirel Josa, insiston se nuk e ndjen trysninë, edhe pse ekipi i tij sapo ka pësuar humbjen e katërt radhazi. Në emisionin “Gol pas Goli” në Supersport ai pranoi se është pak i shqetësuar me ekipin e tij për faktin se tani është përfshirë në një luftë të ethshme për mbijetesë. Përsa i përket golit të parë të Partizanit ai thotë se mund të jetë i parregullt.
“Ato gjëra i vendos arbitrim nuk është problemi se u bë goli në atë formë. Nuk e kemi diskutuar, tani po e shikoj. Por ne momentin që ne kishim topin në zotërim, nuk duhej të humbnim e shkaktonim faull. Dihet që Partizani në lojën në ajër është skuadër e fortë. Këtë e diskutoni ju që e shikoni më të qetë lojën dhe në pozicione më të mira, unë tani e pashë” – tha Josa.
Për pretendimet për penallti në pjesën e parë Josa është i sigurt.
“Kjo ishte penallti, prekja me dorë është evidente. Tashti mund të themi e jep apo jo, por është kompetencë e Metës, apo nga gjyqtari pas portës. Unë gjatë lojës nuk e kam parë, tani më pas ma thanë djemtë që ishte prekje me dorë e topit” – thotë Josa.
Katër humbje radhazi?
“Në presion nuk më vë fare. Normale që katër humbje janë shumë për Tiranën, por e kam parasysh se çfarë skuadre kam dhe çfarë elementësh, të cilët duhet të vazhdojmë të përmirësojmë. Normale që humbja në derbi nuk është e mirë për ne. Por do të shohim ndeshjen me Vlorën, të shohim si veprojmë. Duke pasur parasysh mungesat që do të kemi, do të shohim si do të vendosim skuadrën dhe kush do të luajë. Unë e di shumë mirë se çfarë kam mbrapa, se cilët janë të gatshëm që t’i përgjigjen kërkesave të mia” – thotë Josa.