Letra prekëse e Ranierit pas shkarkimit: “Ëndrra ime vdiq…”

“Dje vdiq ëndrra ime”. Me këto fjalë Claudio Ranieri ka nisur një komunikatë për median pas shkarkimit të tij nga detyra si trajner i Leicester City. 
“Ëndrra ime ishte të qëndroja te Leicester, pas euforisë së fitores së Premier League. Është klubi që dua dhe do të dua gjithmonë, por trishtueshmërisht nuk do të qëndroj”. 
Me një shpirt të gjerë Ranieri ka falënderuar edhe klubin që e shkarkoi.
“Ishte një aventurë e pabesueshme” 
Pas komenteve të shumta të bëra nga kolegët dhe shumë lojtarë që janë rreshtuar në krah të trajnerit italian tashmë me nofkën “Re Caludio” vjen edhe qëndrimi i tij për atë që ka ndodhur. Është i qartë zhgënjimi i tij dhe dëshira që kishte për të qëndruar gjatë në këtë klub. Firmosi pak kohë më parë një zgjatje të kontratës me një pagë 5 milion euro në sezon deri në vitin 2020.
“Gjithçka që ëndërroja ishte që të qëndroja te Leicester. Dua të falënderoj gruan time Rosanna dhe familjen time për mbështetjen e madhe që më kanë dhënë gjatë qëndrimit në Leicester. Falënderimi im shkon për Paolon (asistenti i tij) dhe Andrean (përgatitësi atletik) që më kanë shoqëruar në këtë udhëtim fantastik. Edhe për Steve Kutner dhe Paolo Granello që më lejuan të shpallem Kampion. 
Mbi të gjitha dua të falënderoj Leicesterin. Aventura ishte e pabesueshme dhe do të qëndrojë brenda meje përgjithmonë” – shkruan Ranieri.  
“Falënderoj të gjithë gazetarët që më kanë qëndruar pranë dhe që kanë rrëfyer një nga histritë më të bukura në historinë e futbollit. Një falënderim për të gjithë komponentët e klubit, lojtarëve dhe stafit dhe të gjithë atyre që bënë të mundur atë që arritëm”. 
Falënderimi më i madh shkon për tifozët e “dhelprave”.
“Më keni dashur dhe më keni vënë në zemrat tuaja. Ju dua edhe unë. Askush nuk mund të më largojë nga ajo që arritëm së bashku. Shpresoj që t’i kujtoni të gjitha ato ditë dhe të qeshni duke i kujtuar. Kanë qenë momente mrekullie dhe lumturie që nuk do t’i harroj kurrë. Ishte një nder dhe një kënaqësi të bëhesha Kampion së bashku me ju”. /lapsi.al/