PSG kërkon nga UEFA të drejtën pas eliminimit në Ligën e Kampioneve. Edhe pse protagonistët e ndeshjes kanë theksuar se gjykimi nuk është justifikimi i vetëm për humbjen e thellë ndaj Barcelonës, drejtuesit e klubit duan që të paktën gjyqtari Deniz Ajtekin të mos shohë më fushën e lojës në aktivitete ndërkombëtare. Sipas mediave ndërkombëtare, në UEFA është dërguar një dosje e mirëfillte me vlerësimet e ish-gjyqtarëve ndërkombëtarë për sjelljen e Ajtekin gjatë ndeshjes dhe episodet të cilat parisienët mendojnë se kanë ndikuar plotësisht në eliminimin e skuadrës së tyre.
Vendimet e gabuara në dosje
- Prekja me dorë nga Masçerano. Mund të sillte një penallti për skuadrën e PSG-së dhe sigurisht fati i ndeshjes do të ndryshonte plotësisht. Ajtekin, vetëm 18 metra larg, bëri shenjë që loja të vazhdonte.
- Kërkohej karton i kuq për Pike. Mbrojtësi u ndëshkua me të verdhë për një faull ndaj Kavanit në minutën e 23-të, por u fal në fundin e pjesës së parë për një tjetër ndërhyrje të rëndë ndaj uruguaianit.
- Penalltia e Meunier ndaj Neimar. Episodin e minutës së 48 e vendosi gjyqtari i vijës së portës, një vendim pa precedent në Ligën e Kampioneve. Ajtekin ishte vetëm 15 metra larg aksionit ndërsa gjyqtari i vijës së portës ishte 30 metra larg, por ishte ky i fundit që dha vendimin, rreth 17, 4 sekonda me vonesë.
- Agresioni i Neimar. Braziliani i dha një shkelm Markinjos pa qenë në duel për topin, kur rezultati ishte 3-1. Parisienët mendojnë se duhej ndëshkuar me karton të kuq por do të kënaqeshin edhe me një të verdhë. Ajtekin nuk e ndëshkoi në atë moment brazilianin, por 10 minuta më vonë, kur ai simuloi në zonë. Neimar rezultoi vendimtar për fatin e ndeshjes pasi dha dy asist dhe shënoi një gol në këtë ndeshje.
- Simulimet e Suarez. Uruguaiani u ndëshkua me karton të verdhë për një shfaqje teatrore në zonë në fillimin e ndeshjes. Por në fund arriti gjithsesi të mashtronte gjyqtarin duke e fituar një penallti për të ndihmuar ekipin në fitoren 6-1.
- Prekja me dorë e Pike. Parisienët protestuan për një prekje të topit me dorë të Pike në zonë në minutën e 78, kur rezultati ishte 3-1. Një penallti në atë moment do të kishte mbyllur çdo diskutim.
- Penalltia dhe karton i kuq për Masçeranon për ndërhyrjen ndaj Di Marias. E pranoi edhe vetë mbrojtësi i Barcelonës, ajo ishte gafë e rëndë e gjyqtarit.
- Penalltia inekzistente e Luis Suarez. Ajo që parisienët mendojnë se duhej të ishte një karton i dytë i verdhe dhe e kuqja për simulim e sulmuesit uruguaian, u kthye në penalltinë e rezultatit 5-1 për Barcelonën./panorama-sport/