Policia britanika publikoi fotot e fundit të 23-vjeçarit Salman Abedi, mbrëmjen e 22-majit, kur gjatë koncertit të Ariana Grandes shpërtheu një bombë dhe la të vdekur 22 persona e plagosi 59 të tjerë.
Ngjarja e rëndë ndodhi në dalje të “Manchester Arena”.
Fotot tregojnë kamikazin i veshur sportiv, me atlete, xhinse një xhup të zi dhe një kapele bejsbolli në kokë. Ndërsa në krahë i dallohet rripat e çantës që mbante mbi shpinë, e cila ishte e mbushur me eksploziv.
Rregullimet e fundit të brezit eksploziv që mbante në trup, Abedi mësohet t’i ketë bërë në apartamentin e tij, në qendër të qytetit.
Sipas policisë britanike, pjesët përbërëse të bombës që Abedi shpërtheu janë blerë në një periudhë kohore prej një viti, mënyrë e mirëmenduar kjo, për të mos tërhequr vëmendjen e autoriteteve.
Tashmë që një pjesë e madhe e atyre, që dyshohen si bashkëpunëtore të kamikazit janë arrestuar, policia britanike zbulon detaje mbi hetimet.
Mësohet se, identiteti i tij u bë i njohur për policinë dy orë pas sulmit. Gjatë këtyre ditëve janë bastisur 14 prona dhe janë arrestuar 13 persona të dyshuar për terrorizëm.
Me arrestimin e tyre, autoritetet britanike ulin edhe nivelin e alarmit për sulme, i cili ishte ngritur në pikën maksimale (5), që prej së hënës. /LAPSI.AL/