Arrestohet për korrupsion presidenti i Federatës së Futbollit në Spanjë, Angel Maria Villar

Presidenti i Federatës Spanjolle të Futbollit (RFEF), Angel Maria Villar, është arrestuar të martën paradite, bënë të ditur burime zyrtare.
Janë arrestuar edhe persona të tjerë, mes të cilëve djali i tij Gorka dhe një drejtues i lartë i federatës.
Burime zyrtare bëjnë të ditur se arrestimet janë kryer në kuadrin e një hetimi për korrupsion.
“Presidenti i RFEF akuzohet për abuzime financiare në ndeshjet që ka zhvilluar seleksioni spanjoll i futbollit me seleksione të tjera, duke i siguruar të ardhura financiare edhe të birit”, theksohej në një njoftim të Gardës Civile, që ka realizuar arrestimet.
Angel Maria Villar, 67 vjeç, është i angazhuar me futbollin spanjoll që nga viti 1988. Ai është gjithashtu zv/president i UEFA-s dhe FIFA-s.
Zëdhënësi i qeverisë spanjolle, Inigo Méndez de Vigo, ka reaguar menjëherë lidhur me arrestimin e tij në televizionin publik, duke theksuar se “Asnjë person nuk është i paprekshëm, të gjithë duhet të jenë të barabartë para ligjit”.