Mediat greke vazhdojnë t’i kushtojnë vëmendje kapjes së gomones me 1.6 ton kanabis e nisur nga brigjet shqiptare. Tv Skai publikon për herë të parë pamjet e gomones së kapur nga policia, ku shihen qartë edhe shenjat e plumbave që kanë goditur mbi të.
Gjatë operacionit policia hapi zjarr ndaj gomones, duke plagosur edhe një prej trafikantëve shqiptarë. Gomonia është 12 metra e gjatë dhe e pajisur me tre motorë të fuqishëm. Në kuadër të këtij operacioni i cili nuk ishte i rastësishëm, policia arrestoi 11 persona, katër prej të cilëve ishin shtetas shqiptarë.
Gomonia ishte nisur nga brigjet pranë Himarës. Mediat greke thonë se droga i përkiste një grupi kriminal të strukturuar, ku janë të përfshirë shtetas shqiptarë, grekë dhe italianë.
©Lapsi.al