Rama nis betejën me portalet online, shmang vëmendjen nga “30 qershori”

Në një deklaratë për media ministrja e Drejtësisë Etilda Gjonaj prezantoi këtë të mërkurë paketën ligjore “Anti – Shpifje”. Ajo bën një sërë ndryshimesh në ligj, në një draft të kritikuar që në gjenezë nga faktorët vendas dhe të huaj. Ministrja tha se “kjo iniciativë erdhi si pasojë e një fenomeni shqetësues jo vetëm për Shqipërinë por edhe në vende të tjera të Bashkimit Evropian, ku media shpesh herë përdoret si instrument duke pasur për referencë jo faktet konkrete por lajmet e rreme”.

Tashmë që “30 qershori” kaloi, Rama tenton të çojë vëmendjen në një tjetër çështje duke rinisur “betejën” me portalet.

“Tashmë dihet se një shqetësim i vërejtur në shoqërinë tonë është përhapja në kohë reale e lajmeve të pavërteta, duke u shndërruar pas çdo dite në një problematikë për pavarësinë e gazetarëve, dinjitetin e qytetarëve dhe jetën familjare. Mungesa e transparencës të një sërë platformash online, mungesa e regjistrimit të tyre si në cdo shtet evropian, kanë qënë arsyet e rishikimit të kuadrit ligjor ekzistues me qëllim parandalimin dhe zvogëlimin e efekteve negative që përcjell në shoqëri keqinformimi dhe përhapja e lajmeve të rreme” – tha Gjonaj.

Sipas ministres “regjistrimi i portaleve i shërben transparencës mbi pronarët e mediave, shmangies së konfliktit të interesave, ndikimit të papërshtatshëm të aktorëve politik, garantimin e pavarësisë së gazetarëve si dhe pluralizmit të medias”. ©lapsi.AL

DRAFTI I QEVERISE PER PAKETEN ANTI-SHPIFJE

Paketa Antishpifje konsiston në ndërhyrjet ligjore në ligjin “Për mediat audiovizive, ligjin “Për komunikimet elektronike, “Për tatimin mbi vlerën e shtuar” si edhe në VKM-në për masat e mbrojtjes së fëmijëve nga aksesi në përmbajtje të paligjshme në internet.
Këto ndërhyrje sigurojnë:
1.procedura të shpejta administrative mbi trajtimin e ankesave për programet e publikuara nga Ofruesit e Shërbimit të Publikimeve Elektronike
2. reagim të shpejtë të institucioneve publike në rast të konstatimit të cënimit të të drejtave të individëve, duke parashikuar një procedurë të qartë me hapa konkretë për trajtimin e ankesave.
3.Krijimin e një regjistri që administrohet nga AKEP ku regjistrohen Ofruesit e Shërbimit të Publikimeve Elektronike, të pajisur me numër të regjistrimit të personit të tatueshëm, ose të regjistruar në regjistrat tregtarë.
3.Ofruesit e shërbimeve mediatike do të monitorohen nga AMA. Paketa antishpifje në asnjë dispozitë të saj, nuk cenon lirinë e shprehjes dhe pluralizmin e tregut por synon përcaktimin e disa standardeve etike në mënyrë që të respektohet dinjiteti dhe të drejtat themelore të njeriut.