Greqia ndan pikëpamje mjaft të afërta me Serbinë kur flitet rreth dialogut me fqinjin jugor, Kosovën.
Gjatë një takimi në prag të Asamblesë së Përgjithshme të OKB-së, që po mbahet në Nju-Jork, kryeministri grek, Qirjako Micotaqis, i deklaroi presidentit serb, Aleksandër Vuçiç, se qeveria e tij nuk ndryshon qëndrim lidhur me sovranitetin dhe njohjen e pavarësisë së Kosovës.
Vuçiq e vlerësoi këtë si hap thelbësor për Beogradin.
Ai informoi shefin e ekzekutivit grek për vendimet maksimaliste të Prishtinës, përkatësisht tarifimin 100 për qind të mallrave serbe në dogana, duke thënë se po dëmtohen mundësitë për normalizimin e raporteve.
Ideja u përforcua edhe nga Micotaqis, i cili shprehu përkrahje për tryezat e përbashkëta dhe heqjen dorë nga pozicionet e njëanshme.
Të martën, çështja e Kosovës pritet të jetë sërish në fokusin e një takimi të thirrur nga kancelarja gjermane Angela Merkël me presidentin Vuçiq.
Axhenda e ngjeshur e kryeshtetarit serb do të vijojë deri ditën e enjte, dhe parashikon takime me kreun e Shtëpisë së Bardhë, Donald Trump, homologun turk, Rexhep Taip Erdohan, dhe shefin e OKB-së, Antonio Guterres.
Dialogu Kosovë-Serbi dominoi të dielën edhe një darkë pune mes shtetarëve të Ballkanit Perëndimor dhe kryediplomates europiane, Federika Mogerini, ku palët theksuan edhe një herë nevojën për marrëveshje dypalëshe.