Carlo Ancelotti e di si të luajë një gjysmëfinale të Ligës së Kampionëve. E megjithatë Real Madrid i tij duhet të bëjë llogaritë me Manchester City të drejtuar nga Pep Guardiola. Kjo është pengesa e fundit për tu kapërcyer, nëse duan të luajnë aktin e fundit të kompeticionit. “Do të na duhet një ndeshje e plotë – komentoi trajneri italian në vigjilje –. Ose më mirë duhet të japim maksimumin fizikisht, teknikisht dhe mendërisht”. Real shkon në gjysmëfinalen e Champions me moralin e fortë pas triumfit në Copa del Rey: “Motivimi ndonjëherë është më i rëndësishëm se forma fizike dhe ky trofe na ka dhënë entuziazëm të ri”.
HISTORIA E NJË VITI MË PARË
Të luash kundër Manchester City krijon dhimbje koke edhe për trajnerin me më shumë Champions në palmares: “Nëse mbrohesh mirë, më e keqja që mund të vijë është një barazim. Por kjo nuk do të thotë se nuk do të sulmojmë. Le të kujtojmë se vitin e kaluar pësuam 5 gola duke bërë 6 në dy ndeshje. Do të firmosja të bëja të njëjtën gjë këtë vit”, komentoi Ancelotti duke iu referuar gjysmëfinales së sezonit të kaluar.
Lexo më tej: Parashikimi i Rooney në Champions: “City do ta shkatërrojë fare Real Madrid”
Siguria e teknikut Ancelotti është se kualifikimi “do të vendoset në ndeshjen e dytë”. Kjo është arsyeja pse Real Madrid dëshiron të evitojë dëmet para tifozëve të tyre: “Për të pasur një avantazh do të duhet të dalim me një rezultat pozitiv nga ndeshja e parë. Por jo vetëm për rezultatin, por edhe për të shmangur problemet fizike apo disiplinore. Kjo sfidë kërkon përpjekje maksimale nga të gjithë”.
RREZIKU HAALAND
Përballë do të jetë Erling Haaland, qendërsulmues rekord me Manchester City: “Ai është shumë i rrezikshëm, ka një cilësi mbresëlënëse në shënimin e golave. Por i gjithë City është një ekip i kompletuar. E ne nuk do të luajmë për të ndaluar Haaland, por të gjithë skuadrën. Kemi shanset tona për të fituar edhe pse, në krahasim me vitin e kaluar, formacioni i Guardiolës është më i kompletuar”.