Kurti flet në telefon me Blinken: Diskutuam për veriun

Kryeministri i Kosovës, Albin Kurti ka zhvilluar këtë të hënë një bisedë telefonike me Sekretarin Amerikan të Shtetit, Anthony Blinken. Siç njofton vetë Kurti, në telefonatën me Blinken u fol për gjendjen në katër komunat veriore të Kosovës, ku është theksuar se zgjedhjet e reja duhen paraprirë nga sundimi i ligjit.

Sipas të njëjtave burime u bisedua edhe për ekstremistët e dhunshëm që sulmuan ushtarët e KFOR-it, Policinë e Kosovës dhe gazetarët. Më tej në njoftim theksohet se Kurti i ka përmendur Blinkenit konfiskimin e armatimit dhe municionit të shumtë në një makinë me targa serbe.

“U fol për nevojën për zbatim të plotë, të sekuencuar drejt e pa kushte të Marrëveshjes Bazike të Brukselit, si dhe për lirimin e tre policëve të Kosovës të rrëmbyer nga Serbia në Leposaviq por pasi që atyre iu ngrit aktakuza e për çfarë Departamenti i Shtetit Amerikan i pari kërkoi lirim të menjëhershëm e pa kushte. Të dy u pajtuan që të mbeten në komunikim të rregullt e të dendur në funksion të paqes e sigurisë në Kosovë e drejt normalizimit të marrëdhënieve me Serbinë”, – thuhet në njoftim të Qeverisë së Kosovës.

Ndërsa vetë Kurti ka shkruar në Twitter: “Ishte kënaqësi të flisja sot me Sekretarin Blinken në telefon. E falënderova për mbështetjen e jashtëzakonshme që SHBA ka dhënë vazhdimisht për Kosovën. Diskutuam situatën në veri, rëndësinë e zbatimit të ligjit dhe zbatimin e plotë të Marrëveshjes bazë. Ne ramë dakord të qëndrojmë në kontakt në vazhdim” – shkruan Kurti.

Pak ditë më parë Blinken bëri deklarata të forta për Kurtin pas tensionimit të gjendjes në veri ndërsa ky i fundit e quajti naiv dhe të nxituar kryediplomatin amerikan. ©LAPSI.al

A pleasure to speak w/ @SecBlinken over the phone today. I thanked him for the tremendous support 🇺🇸 has continuously given 🇽🇰. We discussed the situation in the north, and the importance of RoL & full implementation of the Basic Agmt. We agreed to stay in contact going forward.

— Albin Kurti (@albinkurti) June 26, 2023