Pak ditë para finales së Champions League, marrëveshja e sponsorizimit e arritur nga Borussia Dortmund me gjigantin gjerman të industrisë së mbrojtjes Rheinmetall po bën bujë. Marrëveshja për tre vitet e ardhshme mes prodhuesit të armëve dhe klubit është bërë e ditur sot nga selia verdhezi me një shënim.
Një zëdhënës i kompanisë nga Düsseldorf nuk pranoi të komentojë mbi volumin financiar, por, sipas Handelsblatt, marrëveshja vlen rreth një milion euro në vit. Partneriteti thuhet se përfshin përdorimin e hapësirës reklamuese shumë të dukshme, të drejtat e marketingut dhe shërbimet e ngjarjeve dhe mikpritjes në stadiumin dhe terrenin e klubit. Rheinmetall do të bëhet ‘Champion Partner’ i Borussia, domethënë një sponsor financiar veçanërisht i rëndësishëm.
Drejtori i Përgjithshëm i Borussia, Hans-Joachim Watzke, ishte gjithësesi i përgatitur për kritikat dhe shpjegoi se “siguria dhe mbrojtja janë shtyllat themelore të demokracisë sonë. Kjo është arsyeja pse ne besojmë se është vendimi i duhur për të reflektuar intensivisht se si të mbrohen këto shtylla. Sidomos sot, kur ne shohim çdo ditë sesi duhet mbrojtur liria në Evropë, ne duhet të përballemi me këtë normalitet të ri. Ne presim me padurim partneritetin tonë me Rheinmetall dhe, si Borussia Dortmund, jemi të hapur me vetëdije për një diskutim”.
Kjo është hera e parë që një prodhues armësh sponsorizon një ekip futbolli në Bundesliga, megjithëse Rheinmetall është tashmë një sponsor i klubit të hendbollit Bergischer HC në Solingen, jo shumë larg nga Düsseldorf. Sponsorizimi i kompanisë së armëve për Borussia Dortmund është kritikuar ashpër nga disa tifozë dhe shoqata pacifiste.