Një tërmet me magnitudë 7.2 ballë Righter ka goditur brigjet e Perusë herët të premten, duke plagosur të paktën tre persona dhe duke shkaktuar një alarm për cunami dhe duke tronditur ndërtesat deri në kryeqytetin, Lima, rreth 600 milje larg. Tërmeti goditi rreth një milje larg brigjeve të rajonit Arequipa të Perusë në orën 12:36 të mëngjesit me orën lokale.
Autoritetet peruane lëshuan një alarm për cunami në bregdetin e vendit dhe paralajmëruan se valët mund të arrijnë në qytetin e Puerto Atico deri në orën 12:52 të mëngjesit. Qendra e Paralajmërimit të Cunamit të Shteteve të Bashkuara tha rreth një orë më vonë se kërcënimi i cunamit kishte kaluar. Nuk është raportuar për vdekje, por tetë persona u trajtuan për lëndime, sipas Ministrisë së Shëndetësisë peruane, ndërsa zyrtarët vazhduan të monitoronin pasojat e tërmetit.
Ministria tha në një deklaratë se një spital në qytetin Acarí, afër epiqendrës, kishte trajtuar tre persona me lëndime të lehta. Pesë persona të tjerë u trajtuan në spitalet në Ica, afërsisht 165 milje në veriperëndim të epiqendrës, tha ministria më vonë. Ka pasur raporte për rrëshqitje dheu, shtëpi të dëmtuara dhe rrugë të bllokuara, sipas mediave lokale të lajmeve. Pas tërmetit, videot në mediat sociale treguan mobiljet dhe kamerat e sigurisë që dridheshin për gati 30 sekonda, përfshirë edhe në Lima.