Beleri reagon për herë të parë pas lirimit: Lufta ime tani fillon

Fredi Beleri, i cili sot u lirua nga burgu me kusht ka reaguar për herë të parë, duke thënë se është krenar, por jo i lumtur, pasi sipas tij drejtësia nuk u dha ashtu siç duhet.

Skai.gr teksa citon reagimin e Belerit, thotë se ai do ta çojë çështjen e tij në Gjykatën Evropiane për të Drejtat e Njeriut.

“Pas 16 muajsh paraburgim të vazhdueshëm, tani jam i lirë dhe krenar, por sigurisht jo i lumtur sepse shteti i së drejtës dhe demokracia në Shqipëri nuk u rivendos, institucionet nuk funksionuan, drejtësia nuk u dha ashtu siç duhet. Vendimi i sotëm është vetëm një pikë në oqeanin e drejtësisë. Lufta ime tani fillon. Vetëkuptohet se do të ankimoj në Gjykatën Evropiane të të Drejtave të Njeriut për atë që më mohoi regjimi shqiptar në një grusht shteti”,ka thënë ndër të tjera Beleri.

Më tej Beleri u shpreh se duke ushtruar detyrat e eurodeputetit grek, do të mund të fokusohem në çështjet e minoritetit etnik grek dhe të shtetit ligjor, pa frikë, por vetëm me pasion.

“Sot do të jem mes vëllezërve të mi në Himarë. Aty ku filloi aventura ime dhe e konsideroj të drejtë të jetë. Nga zemra, dua të falënderoj kryeministrin grek , Kyriakos Mitsotakis, i cili me vendimin e tij të guximshëm për të më përfshirë në votën evropiane të Demokracisë së Re ndryshoi rrjedhën e historisë sime. Dhe sigurisht miqtë e mi të ngushtë, Angelos Syrigos dhe Stavros Papastavrou për mbështetjen e tyre të palëkundur. Ishin gjithmonë aty, nuk do ta harroj. Në fund, dua të falënderoj qytetarët grekë që gjatë gjithë kësaj kohe më kanë dhënë forcën të mos përkulem, të duroj dhe të vazhdoj të luftoj”, ka deklaruar eurodeputeti.