Elbasani rrëmben vendin e parë, edhe pse në shoqërinë e Partizanit, Egnatias e Vllaznisë, pas suksesit 1-0 ndaj Laçit në javën e katërt të Superiores. Vendosi sfidën një gol i Ze Gomes në pjesën e dytë, që fundos Laçin, ende pa asnjë fitore në kampionat.
Verdheblutë e Bordin luajtën me konfidencë, duke kontrolluar lojën e sidomos mesin e fushës. Laçi e vuajti intensitetin dhe motivimin e verdhebluve dhe rrezikoi në disa raste të pësonte, më flagranti në pjesën e parë ai i Melos, tentativa e të cilit shkoi ngjitur me shtyllën në fundin e pjesës së parë.
Laçi u mundua të ndryshonte sjellje në pjesën e dytë, madje duke rrezikuar të bënte keq në dy raste: Tresën në të 54’ dhe Myrta në minutën e 58’, u ndalën nga reagimi spektakolar i portierit ganez të verdhebluve Abalora. Bordin nga ana e tij kërkoi reagimin e të tijve, që erdhi praktikisht në momentin më të mirë të miqve kurbinas. Ze Gomes goditi saktë me kokë, pas krosimit të Arsen Kasës, duke kaluar në avantazh vendasit në minutën e 72’.
Lexo më tej: Video/ Rrapaj ndez festën e Partizanit në të 91’, Vila e shuan në të 95’: Dinamo e Daja evitojnë humbjen
Elbasani mund të kishte dyfishuar edhe shifrat me rastin në minutën e 96’ të Lajthisë, por pavarësisht kësaj tre pikët ishin të salduara për verdheblutë e Bordin, që ngjitet në krye, duke fundosur edhe më keq Laçin e Cungut, ende pa asnjë fitore. 7 pikë për Elbasanin, një surprizë e bukur në këtë fillim kampionati.