Komplot i CIA-s për të vrarë Maduron? Reagon DASH: Pretendimet janë të rreme

Departamenti Amerikan i Shtetit ka hedhur poshtë pretendimet për përfshirjen e CIA-s në një komplot të dyshuar për të vrarë liderin e Venezuelës Nicolás Maduro, pasi autoritetet venezueliane thanë se kishin arrestuar gjashtë të huaj, duke përfshirë një anëtar të marinës amerikane.

Departamenti i Shtetit i quajti akuzat “kategorisht të rreme”, duke shtuar në një deklaratë se Shtetet e Bashkuara “vazhdojnë të mbështesin një zgjidhje demokratike të krizës politike në Venezuelë”. Komentet vijnë pasi Venezuela tha se kishte arrestuar gjashtë personat, për një komplot të dyshuar për të “destabilizuar” vendin, që ka qenë në krizë që nga zgjedhjet e diskutueshme në fillim të këtij viti. Ministri i Brendshëm Diosdado Cabello pretendoi se komploti i supozuar drejtohej nga CIA dhe kishte për qëllim vrasjen e Maduros.

Akuza vjen pasi opozita e Venezuelës, shumë liderë të Amerikës Latine dhe Shtetet e Bashkuara refuzojnë të njohin fitoren e diskutueshme të Maduros në zgjedhje, e cila është pasuar nga protesta vdekjeprurëse gjatë të cilave mijëra persona u arrestuan.

Ministri përmendi dy amerikanë të tjerë të arrestuar: David Estrella dhe Aaron Barrett Logan. CNN në fillim të këtij muaji raportoi se Castaneda u arrestua në Karakas në gusht. Në atë kohë autoritetet amerikane thanë se ai ishte një marinar që kishte udhëtuar në Venezuelë.

Javën e kaluar, prokurori i përgjithshëm i Venezuelës Tarek Uilliam Saab i tha CNN se marinari ishte një shtetas meksiko-amerikan që po hetohej për hyrjen në vend pa dokumentacion të duhur. Cabello tha se përveç amerikanëve, dy shtetas spanjollë – José María Basoa Valdovinos dhe Andrés Martínez Adasme – dhe një shtetas çek, Jan Darmovzal, u arrestuan. Autoritetet venezueliane kanë sekuestruar gjithashtu 400 pushkë amerikane të lidhura me komplotin e supozuar, tha ai.

“CIA është në ballë të këtij operacioni,” tha Cabello në konferencën për shtyp, duke pretenduar se Qendra Kombëtare e Inteligjencës e Spanjës ishte gjithashtu e përfshirë. “Kjo nuk na habit aspak,” tha ai. Ai pretendoi se operacioni kishte “objektiva shumë të qarta të vrasjes së Presidentit Nicolás Maduro” dhe politikanëve të tjerë të rangut të lartë venezuelas, duke përfshirë atë dhe nënpresidentin.

Departamenti i Shtetit konfirmoi të shtunën se një anëtar i ushtrisë amerikane ishte arrestuar në Venezuelë dhe se departamenti ishte “në dijeni të raporteve të pakonfirmuara të dy shtetasve të tjerë amerikanë të arrestuar” në vend. Departamenti po kërkon informacion shtesë, tha zëdhënësi.

Një burim i ministrisë së jashtme spanjolle i tha Reuters se po i kërkonte Venezuelës më shumë informacion. “Ambasada spanjolle i ka dërguar një notë verbale qeverisë së Venezuelës duke kërkuar qasje për qytetarët e arrestuar për të verifikuar identitetin dhe kombësinë e tyre dhe për të ditur se për çfarë akuzohen saktësisht”, tha burimi për Reuters, duke folur me kusht të anonimitetit.

Ministria e Punëve të Jashtme të Republikës Çeke konfirmoi për CNN se një shtetas çek është arrestuar në Venezuelë. Ata shtuan se ambasada çeke në Bogota është në kontakt me familjen pasi vendi nuk ka një ambasadë në Venezuelë. /BW