Ndryshimet në ligjin për noterinë, ku numri i juristëve të licencuar për të ofruar këtë shërbim përcaktohet në raportin 1 për 15 mijë banorë, janë kundërshtuar nga Ministria e Drejtësisë. Në relacionin që shoqëron draftin e që mban firmën e depozituesit Pandeli Majko, theksohet se ky është propozim i ekspertëve të EURALIUS-it, por ministrja Etilda Gjonaj kundërshtoi, duke paralajmëruar deputetët mbi pasojat e një vendimi të tillë.
“Problematik është raporti i numrit të noterëve me numrin e popullsisë, ku thuhet 1 me 15 mijë. Do të duhet që të mos organizohen më konkurse, testime të prodhimit të noterisë për t’u certifikuar dhe të mos lëshohen më licenca të reja për 15 vite”, tha Gjonaj.
Kreu i Komisionit të Ligjeve, Ulsi Manja u duk se nuk e pëlqeu ndërhyrjen e qeverisë, duke rikujtuar se projektligji ishte miratuar tashmë në parim: “Se sa do të jetë raporti, kjo është çështje e studimeve që janë bërë për këtë projektligj. Nuk mund të diskutohen pafundësisht këto gjëra”.
Numri i noterëve nuk ishte i vetmi shqetësim i ministres Gjonaj, e cila theksoi se nocioni i ri i zv/noterit rrezikon të cenojë sigurinë juridike: “Zv/noteri nuk është një person i kualifikuar si noter, nuk mund të kryejë veprime noteriale. Kjo formë rrezikon sigurinë juridike”.
Në këto kushte, Komisioni i Ligjeve shtyu mbledhjen me shpresën e gjetjes së dakortësisë me qeverinë./tch
Per 10 milion lek ne kohen e qoftlargut, beheshe nga zbutes ariu ne noter.
Duhen ulur urgjentisht pagesat teper te larta te veprimeve noteriale te cilat u ngriten artificialisht sepse per te marre nje license noteri duhej te paguaje mbi 100 mije euro, prandaj u rriten cmimet per tr nxjerre keto pagesa korrupsioni