Mbrëmje e madhe e Champions League në raundin e 16 më të mirave me Paris Saint Germain që imponohet në Old Trafford edhe me mungesat e mëdha të Neymar Jr e Edinson Cavani. Thyhet për herë të parë Manchester United që kur Ole Gunnar Solskjaer është ulur në pankinë, e për PSG 0-2 i fiksuar është praktikisht cerekfinale. Fiton edhe Roma në Olimpico, por në Dragao do të jenë telashe pas golit të Adrian Lopez.
U duk se 11 ndeshjet pa humbje të United, përpara publikut të shtëpisë e me një kundërshtar të gjymtuar e pa pjesët më të mira, do ta ndihmonin Manchester United të merrte një sukses të rëndësishëm, sidomos pas zërave për një konfirmim të teknikut norvegjez si menaxher me kohë të plotë tek Djajtë e Kuq. Vetëm se skuadra e Thomas Tuchel e improvizuar me mbrojtësin e djathtë Dani Alves në sulm, bashkë me Di Maria dhe Mbappe, i dha zhgënjimin e plotë në debutimin e norvegjezit në Champions League.
Ekuilibrat e një ndeshje delikate u thyen në pjesën e dytë, kur dy gabime difensive të anglezëve rrëzuar strategjinë e ngritur në harkun e shtatë minutave: Kimpembe u harrua në shtyllën e dytë në minutën e 53, në zhvillimet e një goditje këndi, ndërsa djali i artë i PSG vulosi rezultatin në të 60, duke finalizuar asist të marrë nga Di Maria.
Sikur të mos mjaftojë avantazhi i dy golave në ndeshjen e kthimit në Parc de Prince, PSG do të ketë një kundërshtar përballë edhe pa lojtarin e saj më të cmuar Paul Pogba, i ndëshkuar me karton të kuq në fund të ndeshjes. Kështu pas dy javësh francezët duket se i kanë të gjitha gjërat në vijë për të arritur çerekfinalen.
Gati e arriti rezultatin e ëndërruar, por Roma duhet të mallëkojë fatin e keq që rifuti në lojë Porton, 11 minuta nga fundi duke e bërë madje formacionin portugez të kalojë në cerekfinale edhe më një fitore 1-0 në kthim. Zaniolo është protagonisti absolut në suksesin 2-1 në ndeshjen e parë të 1/8 së finales në Ligën e Kampionëve, por për Di Francesco ishte shumë e bukur për të qenë e vërtetë.
Talenti italian ka shënuar golin e parë në minutën e 70, duke ngritur në këmbë stadiumin, që gjithësesi nuk harroi të kapej me Kolarov, edhe në këtë ndeshje shumë të rëndësishme për verdhekuqtë. Zaniolo shënoi dygolshin e parë në Champions League, në minutën e 76, duke i bërë tifozët romanë të ëndërrojnë.
Vetëm se futbolli ndonjëherë është edhe cështje fati dhe këtë herë ai nuk ishte me italianët. Vetëm tre minuta pasi kishin prekur rezultatin e sigurisë, një aksion kaotik i portugezëve i dha mundësinë Adrian Lopez të fuste në lojë Porton, duke e bërë krejtësisht të mundur përmbysjen në do Dragao, pas dy javësh.