Me rastin e festimit të 15-vjetorit të zgjerimit lindor të Bashkimit Evropian në vitin 2004, me 10 vende të Evropës Lindore dhe Qendrore, 8 prej të cilave ish-komuniste, komisioneri i politikës evropiane të Zgjerimit dhe të Fqinjësisë së Mirë, Johannes Hahn, duke kujtuar realizimin e këtij vizioni ambicioz për ribashkimin e kontinentit përmes ruajtjes së paqes dhe të prosperitetit, nuk ka lënë pa përmendur rëndësinë e integrimit të gjashtë vendeve të Ballkanit Perëndimor. “Ky vizion u realizua dhe tani është koha për të hedhur vështrimin përpara dhe për të finalizuar projektin historik të unifikimit të europianëve duke integruar edhe Ballkanin Perëndimor”, ka shkruar Hahn në një postim në llogarinë e tij personale në rrjetin social “Twitter”.
“Jam i sigurt se, me përpjekje të përbashkëta, kjo do të jetë një histori suksesi për të dyja palët, Bashkimin Europian dhe Ballkanin Perëndimor: Jemi më të fortë së bashku”, përmbyll postimin e tij eurokomisioneri. Të premten e kaluar, para zhvillimit të Samitit të Berlinit mes liderëve të rajonit, kancelares gjermane, Angela Merkel dhe presidentit francez, Emmanuel Macron, në një intervistë për të përditshmen gjermane “Handelsblatt”, Hahn shprehu besimin se Komisioni Evropian do të rekomandojë në fund të majit çeljen e negociatave për anëtarësim me dy vendet kandidate, Shqipërinë dhe Maqedoninë e Veriut, pasi në optikën e tij, ky është një vendim jo vetëm i merituar, por edhe i shtyrë në kohë që nga qershori i shkuar.