Gjykata e Shkallës së Parë në Shkodër dha “Arrest me burg” edhe për bashkëpunëtorin e tij, Bajram Çekorja. Prokurori i çështjes, Albert Murçaj, kërkoi “Arrest me burg” për Bajram Bregun, kërkesë që u pranua nga Gjykata, duke qenë se është një person i dënuar me vendim të formës së prerë.
HETIMET
Bajrush Bregu, i arrestuar tri ditë më parë në një aksion të RENEA-s dhe FNSH-së në Tiranë, është një prej “të fortëve” në Shkodër që njihet si krahu i djathtë i Ibrahim Licit, autori i dyshuar për vrasjen e dyfishtë të vëllezërve Bilali, të ndodhur vetëm pak kohë më parë. 33- vjeçari që mban dhe emrin Bajram Bregu, fshihej në një banesë të marrë me qira në zonën e Komunës së Parisit në Tiranë.
Ai njihet si krahu i djathtë i Ibrahim Licit, autorit kryesor të dyshuar për vrasjen e vëllezërve Bilali më 30 mars të këtij viti dhe pjesëtar i familjes Lici, të cilët tashmë prej më shumë se një viti janë në përplasje me grupin tjetër kriminal Bajri, edhe këta të fundit të arrestuar që në shtator të vitit të kaluar.
Ai është një kontingjent i njohur për Policinë. Në 2016 është dënuar me 4 vite burg për kultivim të bimëve narkotike, kryer në bashkëpunim, si dhe armëmbajtje pa leje. Ndërsa në vitin 2018, Policia gjatë një operacioni në banesë i gjeti një automatik kallashnikov. Barush ose Bajram Bregu, vitin e kaluar gjatë ndjekjes nga Policia e Shkodrës përplasi me mjetin e tij dy patrulla të Policisë, duke i shpëtuar ndjekjes. Përgjatë gjithë kësaj kohe ka qenë person i shpallur në kërkim dhe pas një viti u arrestua në Tiranë në banesë me qira te Komuna e Parisit.
Bregu dyshohet dhe për një sërë ngjarjesh të tjera kriminale, së bashku me Ibrahim Licin. Policia dyshon se Barush Bregu ka ndihmuar shokun e tij në vrasjen e dyfishtë të vëllezërve Bilali, të ndodhur më 30 mars në Shkodër, por edhe në ngjarje të tjera kriminale. Gjithashtu, ai dyshohet edhe si personi që ka ndihmuar Ibrahim Licin në çdo lëvizje të këtij të fundit. Bashkë me 33-vjeçarin u kap edhe Bajram Çekorja, 21 vjeç, banues në Shkodër, i dyshuar për përkrahje të Barush Bregut.
ARMËT
Nga ana tjetër, më 27 prill të këtij viti Policia e Shkodrës pas informacionit për të shtëna në fshatin Luarës të Velipojës, zhvilloi një aksion atje duke menduar fillimisht për ndonjë bazë droge. Policia nuk arriti që të identifikojë se kush ka qëlluar nga mjeti tip “Golf”, pasi personat janë larguar me shpejtësi pa lënë gjurmë.
Pas kontrolleve në çdo shtëpi për të kapur autorët, rastësisht Policia gjeti në banesën e braktisur të shtetasit Gëzim Sela, i cili jeton prej disa vitesh jashtë Shqipërisë, një arsenal armësh dhe municionesh. Gëzim Sela është vjehrri i vëllait të Ibrahim Licit dhe banesa e tij ka të paktën 5 vite e braktisur. Pas kësaj, u ngritën dyshime se Ibrahim Lici mund ta ketë përdorur atë banesë të braktisur si bazë për të lënë armët dhe municionet, si dhe për t’iu fshehur Policisë.
Në atë banesë Policia gjeti një arsenal armësh, si një armë ushtarake të rëndë granatahedhëse (blindëshpues), silenciator, radio policie, 700 fishekë luftarakë, krehra me fishekë kallashnikovi, dy telefona dhe një targë motoçiklete. Armët dhe municionet e gjetura në Velipojë, Policia dyshon se mund të jenë përdorur në ngjarje kriminale dhe aty përveç sekuestrimit janë marrë edhe gjurmët e gjetura, ndërsa vijojnë hetimet. /panorama