“Omicron 5”/ Varianti i ri i Covid që tani po bën namin me infektime

Lufta kundër Covid-it, thonë ekspertët, nuk ka mbaruar aspak. Vëmendjen e ka tërhequr varianti i ri BA.5, i quajtur zakonisht Omicron 5. Është një nënvariant Covid i identifikuar fillimisht në Afrikën e Jugut, por që tani është regjistruar edhe në Evropë me numra që rriten me shpejtësi.

Omicron 5 është më ngjitës se variantet e mëparshme, më i njohuri prej të cilëve është BA.2, por është shumë i ngjashëm me BA.4 me të cilin ndan të njëjtat mutacione.

A po e ndryshon virusi lëkurën e tij?

Pikërisht këto ngjashmëri i bëjnë ekspertët të dyshojnë se BA.4 dhe BA.5 mund të jenë një sinjal se virusi po ndryshon, deri në atë pikë sa të shkaktojë valë të tjera periodike. Debati (të cilit revista “Nature” po i kushton shumë hapësirë në faqen e saj të internetit) është fokusuar te disa ekspertë që besojnë se nënvariantet e afta për të gjeneruar valë të reja meritojnë një emër të duhur, siç ka ndodhur deri më tani për variantet, nga Alfa në Delta.

“Është vërtet herët të thuhet se virusi po dobësohet” – vëren virologu Francesco Broccolo, i Universitetit Bicocca të Milanos.

Simptomat e variantit Omicron 5 janë shumë të ngjashme me ato të BA.2. Prandaj manifestohet si ftohje klasike me ethe, temperaturë të lehtë dhe dhimbje trupi. Në përgjithësi pas 4-5 ditësh situata kthehet në normalitet në personat e vaksinuar kundër Covid. Sigurisht, shkak për shqetësim janë subjektet e dobëta dhe të moshuarit, të cilëve edhe gripi mund t’u shkaktojë dëme në një situatë ekuilibri të pasigurt.

Kështu që kini kujdes ta vlerësoni Omicron 5 edhe nëse nuk është i rëndë.

“Për njerëzit me temperaturë dhe dhimbje trupi, këshilla është të marrin anti-inflamatorë dhe antipiretikë. Veproni sipas simptomave, gjithmonë padyshim pasi keni folur me mjekun tuaj të familjes”, – thotë Massimo Andreoni, drejtor shkencor i Shoqatës Italiane të Sëmundjeve Infektive.
Terapitë janë të ndryshme për personat e dobët, pra të moshuarit apo ata me patologji të tjera.

“Nuk duhen marrë kortizon dhe antibiotikë”, – shpjegon Andreoni. Omicron 5, në fakt, ka treguar pak aftësi për të zbritur në mushkëri. “Nëse pacienti më pas fillon të vuajë nga probleme të frymëmarrjes, duhet të lajmërojë mjekun”.

A janë vaksinat efektive kundër Omicron 5?

Mjekët thonë se ka një mbrojtje te personat që kanë marrë të dyja dozat në 4 muajt e fundit. Megjithatë duhet pasur parasysh se mbrojtja e siguruar nga vaksinimi zvogëlohet me kalimin e kohës.

Vaksinat mbeten efektive në parandalimin e manifestimeve të rënda të shkaktuara nga Covid-19 dhe variantet e tij. Njerëzit që janë plotësisht të vaksinuar kanë një rrezik më të ulët për të zhvilluar një formë serioze të sëmundjes ose kanë nevojë për shtrimin në spital.

Ekspertët thonë se Omicron 5 është paksa më i vështirë për t’u zbuluar nga tamponët. Për shkak të vaksinave trupi ynë njeh dhe aktivizon mbrojtjen e tij sapo virusi hyn në qarkullim. ©LAPSI.al