Paul Pogba zbuloi një prapaskenë të merkatos në lidhje me Paulo Dybalan, i cili u largua me parametër zero nga Juventusi dhe më pas u transferua në Romë: “Kam biseduar shumë me Paulon, e pyeta pse nuk po qëndronte këtu për të luajtur pak më shumë së bashku”, ka rrëfyer francezi për Dazn – Mu përgjigj se tashmë ishte larguar dhe se duhej ta kisha telefonuar më parë… Por ne gjithmonë bëjmë shaka… Unë dua që ai të jetë i lumtur, mu duk i lumtur me zgjedhjen që bëri për të shkuar te Roma”.
Dybala dhe Pogba luajtën vetëm një sezon së bashku, në 2015/16, por menjëherë krijuan një marrëdhënie të shkëlqyer miqësie, e cila vazhdoi edhe në vitet kur mesfushori francez ishte te Manchester United. Në fillim të verës ata kaluan disa javë pushime së bashku në Miami, atëherë kur lamtumira e Joya me Juventusin ishte e kryer. Tani Paul po njihet me shokët e tij të rinj: “Vlahovic më befasoi, është shumë i fortë. Unë e quaj Du-du, se është më e lehtë se Dusan – rrëfeu Pogba -. Edhe Chiesa, kur e pashë, më bëri përshtypje, është i ri dhe shumë i talentuar. Di Maria? Fideo është një lojtar shumë i fortë, ti e di se çfarë ka ndërmend të bëjë, por nuk arrin kurrë ta kapësh kur shkon nga e majta, ai e prek topin shumë herë, është një fenomen. Locatelli është një lojtar i madh, unë e quaj ‘Super class’ sepse luan me klas dhe ka shumë edhe jashtë fushës, për mënyrën se si vishet dhe lëviz”.