Sevilla thyen heshtjen e klubeve spanjolle për rastin Negreira. Shoqëria andaluziane në fakt ka nxjerrë një shënim zyrtar ku komunikon “shqetësimin dhe indinjatën” e saj. Ky është reagimi i parë për atë që ka dalë nga hetimet e prokurorisë katalanase në lidhje me pagesat e bëra nga Barcelona për ish-zëvendëspresidentin e Kolegjit arbitral në La Liga. Sipas zbulimeve të fundit, klubi blaugrana i ka paguar atij pothuajse 7 milionë euro midis 2001 dhe 2018.
KOMUNIKATA E SEVILLA-s
“Disa ditë pasi informacioni për të ashtuquajturën “rasti Negreira” arriti në opinionin publik, Sevilla FC dëshiron të shprehë shqetësimin dhe indinjatën e saj për atë që dita-ditës zbulohet përmes mediave. Është absolutisht e nevojshme të shkohet deri në fund të çështjes. Për të sqaruar se çfarë ka ndodhur dhe, nëse është e nevojshme, për të konstatuar ndonjë përgjegjësi.
Serioziteti i fakteve të njohura deri më sot, vë në pikëpyetje dhe ngrenë dyshime mbi integritetin e garave të futbollit spanjoll. Kjo e shtyn Sevilla FC të kërkojë publikisht që La Liga dhe RFEF, si përfaqësues kryesorë të futbollit spanjoll, të marrin pjesë në të gjitha proceset që mund të lindin nga kjo çështje, pasi të kenë përfunduar hetimet.
Së fundi, është dëshira e Sevilla FC të pohojë se, përtej klubeve dhe institucioneve të tyre, mbështetësit e të gjitha skuadrave meritojnë respekt. E është përgjegjësi e drejtuesve që të favorizojnë mjedisin e nevojshëm, në mënyrë që ndershmëria e garave në të cilat marrim pjesë, të mos vihet kurrë në dyshim”.
Presidenti i La Liga, Javier Tebas, kishte sqaruar tashmë ditët e fundit se Barcelona nuk rrezikon të marrë penalitete nga drejtësia sportive spanjolle. Faktet për të cilat akuzohet klubi janë tashmë të parashkruara. Organizmat ndërkombëtare, FIFA dhe UEFA, megjithatë, kanë të drejtë të sanksionojnë klubin katalanas nëse akuzat konfirmohen nga drejtësia e zakonshme.