Dëmtimet vazhdojnë të godasin Kombëtaren e Shqipërisë dhe teknikun Sylvinho. Braziliani, pasi humbi Gjasulën pak para grumbullimit, duhet të bëjë tani edhe pa mbrojtësin e djathtë Ivan Balliu. Në këtë pikë, do të ketë një tjetër ndryshim në listën e Kombëtares për dy ndeshjet kualifikuese për Euro 2024 ndaj Moldavisë dhe Ishujve Faroe. Departamenti i Komunikimit në FSHF bën me dije se Balliu nuk do të jetë i gatshëm për këto dy sfida për shkak dëmtimi.
Futbollisti kuqezi nuk ka mbërritur fare në grumbullim, sepse i ishte nënshtruar vizitave mjekësore në Spanjë. Pas ndeshjes së fundit në La Liga me Rayo Vallecano, Balliu është ankuar për një problem në tendinën e muskujve aduktor (muskujt rrëzë kofshës).
Stafi mjekësor i Kombëtares ka qenë në kontakt në vazhdueshëm me klubin spanjoll. E pas konsultave është konfirmuar mungesa e lojtarit në dy ndeshjet e qershorit. Balliu do të nisë ndërkohë fazën e rikuperimit, ndërsa trajneri Silvinjo ka vendosur të thërrasë mbrojtësin Naser Aliji. Futbollisti, i cili numëron 13 ndeshje me Kombëtaren, pritet të mbërrijë në grumbullim të enjten. Aliji do t’i bashkohet ekipit në stërvitje menjëherë për të nisur përgatitjet për dy sfidat zyrtare.