Dhoma e Zgjidhjes së Konflikteve ka marrë tashmë vendimin përfundimtar në lidhje me përplasjen mes Orges Shehit dhe klubit Tirana. Organizmi pranë Federatës Shqiptare të Futbollit, pasi ka vlerësuar faktet e paraqitura nga palët, ka vendosur të anulojë pezullimin që u aplikua nga bardheblutë në fund të tetorit. Kështu, 46 vjeçari Shehi është i lirë të firmosë me cilindo klub të dojë, ndërsa Tirana duhet të paguajë.
Ish-tekniku i Tiranës ka fituar përballjen ligjore me klubin bardheblu, çështje që kishte përfunduar në fokusin e Dhomës së Zgjidhjes së Konflikteve. Klubi, ndërkohë, detyrohet të paguajë rrogat e prapambetura, ndaj ish-trajnerit që në dy vite e shpalli kampion dhe nënkampion formacionin kryeqytetas. Detyrimi i pagave të muajve korrik, gusht, shtator është ajo me faturën më të rëndë financiare, sepse i bashkangjitet edhe e drejta e shfrytëzimit të imazhit. Bëhet fjalë për rreth 25 mijë euro, por bardheblutë duhet të paguajnë Shehin, edhe me vetëm pagën, deri në fund të kontratës. Që do të thotë deri në 31 maj. Në total rreth 9 mijë euro, sepse këtu nuk përfshihet pjesa e shfrytëzimit të imazhit, duke qenë se 46 vjecari nuk është më në detyrë dhe për këtë arsye i pa promovueshëm si figurë.
Lexo më tej: Kush gënjen mes Shehit e Halilit? Trajneri e çon dosjen në FSHF, presidenti pretendon pagesa paradhënie
Orges Shehi është tani një trajner i lirë dhe bllokimi i Tiranës është rrëzuar. Pezullimi, në vetvete i paprecedent për shkak rezultatesh, është bërë nul nga vendimi institucional. Kështu, tekniku mund të firmosë me çdo klub që do të jetë i interesuar për të. E te Partizani duhet të jenë duke fërkuar duart, sidomos pas një serie prej 5 barazimesh radhazi. Tekniku ka një akord verbal me të kuqtë, që mund të kthehet në fuqi pas zgjidhjes së situatës me Tiranën.