Këshilli Europian për refugjatët dhe mërgimtarët, me qendër në Bruksel, ka shprehur rezerva lidhur me një sërë çështjesh që paraqesin nenet e marrëveshjes Rama-Meloni. Ky protokoll parashikon ngritjen e dy qendrave pritëse në Shqipëri për refugjatët nga Afrika e veriut dhe Lindja e Mesme që kapen në det, para se të shkelin tokën italiane.
Gjykata Kushtetuese e Shqipërisë vendosi ta pezullojë ratifikimin e kësaj marrëveshjeje në Parlament. Opozita në Shqipëri u bashkua duke e çuar marrëveshjen Rama-Meloni në Gjykatën Kushtetuese për të kërkuar kontrollin e kushtetueshmërisë së saj.
Catherine Woollard, Drejtore Ekzekutive e Këshillit Europian për Refugjatët dhe të Mërguarit, mendon se në nenet e marrëveshjes në fjalë ka një informacion shumë të kufizuar: “Ka shumë pak detaje se çfarë do të ndodhë në 2 qendrat pritëse të ngritura në Shqipëri, cili është qëllimi i tyre dhe sesi do të menaxhohen ato. Marrëveshja përfshin të gjithë referencat standarde lidhur me të drejtat e njeriut, por nuk ka asnjë informacion sesi do të respektohen këto të drejta. Qendrat janë nën juridiksionin italian në territorin shqiptar më tepër sipas “modelit australian” sesa atij mes Britanisë së Madhe dhe Ruandës,” tha Catherine Woollard në një prononcim për DW.
Cilat janë problemet ligjore që paraqet kjo marrëveshje?
“Ligji aktual i BE nuk lejon zbatimin ekstra-territorial të procesit të kontrollit dhe procedurave kufitare të azilit dhe kthimit. Sipas këtij ligji ky proces duhet të kryhet në territorin Italian”, tha Catherine Woollard.
Ajo theksoi që kryerja e procesit të kontrollit dhe procedurave kufitare në territorin e Shqipërisë, “nuk mundëson garantimin e respektimit të procedurave dhe shkel të drejtat e Kartës së të Drejtave Themelore të Njeriut, të BE-së”.
A është i ligjshëm përdorimi automatik i paraburgimit?
Marrëveshja Rama -Meloni duket se parashikon paraburgimin automatik të refugjatëve që do të mbërrjinë në qendrat pritëse në Shqipëri. “Kjo është e paligjshme. Periudha e qëndrimit nuk mund të jetë më e gjatë se ajo e lejuar nga kuadri ligjor në Itali. Kur përfundon, ata nuk lirohen në Shqipëri, por largohen nga territori shqiptar. Pa dyshim, nga përshkrimi i qendrave pritëse në marrëveshjen Rama-Meloni, ato janë qendra paraburgimi dhe do të konsiderohen si të tilla sipas jurisprudencës kombëtare dhe asaj të Gjykatës Europiane për të Drejtat e Njeriut. Përveç nevojës për një vlerësim individual kushtet e tjera – aksesi në të drejta, kujdesi për shëndetin, dinjiteti – për një përdorim të ligjshëm të paraburgimit nuk ka gjasa që të jenë të plotësuara”, tha për DW Catherinë Woollard.
A ka shkelje të Ligjit Ndërkombëtar të Detit?
Devijimi i operacioneve të kërkim- shpëtimit drejt Shqipërisë lë hapësira për shkelje të ligjit ndërkombëtar të detit.
“Sipas këtij ligji ekziston detyra që njerëzit e shpëtuar të transportohen dhe zbarkohen në një vend të sigurt. Nuk është e qartë nëse Shqipëria është një vend i sigurtë, për shembull, për viktimat e trafikimit, që janë të shumët mes atyre që shpëtohen në Detin Mesdhe. Nuk është e qartë gjithashtu që transporti i tyre në Shqipëri për të qenë të paraburgosur do të thotë të jenë në një vend të sigurtë. Ndërkohë që sipas Konventës së kërkim-shpëtimit, njërëzit duhet të transporohen në vendin më të afërt të sigurtë,” tha Catherinë Woollard.
A ka sfida lidhur me legjislacionin kombëtar të Shqipërisë?
“Po, mund të ketë sfida ligjore në Shqipëri. Pavarësisht pretendimeve në marrëveshjen Rama-Meloni që këto qendra do të jenë nën juridiksionin Italian, ligji shqiptar do të vazhdojë të zbatohet. Sipas ligjit ndërkombëtar, nuk është e mundur që një shtet të lëshojë juridiksionin mbi një pjesë të territorit të tij për qëllimet e këtij protokolli. Shqipëria është gjithashtu e lidhur me Gjykatën Europiane të të Drejtave të Njeriut dhe ka miratuar gradualisht legjslacionin e BE-së duke përfshirë edhe azilin. Njerëzit do të ishin nën juridiksionin italian, do të ishin në tokën italiane. Ata mbeten gjithashtu nën juridiksionin shqiptar”, tha për DW Catherine Woollard.
Gjykata Kushtetuese e Shqipërisë vendosi të pezullojë ratifikimin në Parlament të marrëveshjes Rama -Meloni, të njohur si “Protokolli ndërmjet Këshillit të Ministrave të Republikës së Shqipërisë dhe Qeverisë së Republikës Italiane, për forcimin e bashkëpunimit në fushën e migracionit”. Dy fraksionet e PD, argumentojnë që marrëveshja Rama-Meloni është arritur “në mungesë të plotë të transparencës, në mosrespektim të procedurës së negociimit dhe nënshkrimit. Ajo është një marrëveshje që prek territorin e Shqipërisë dhe të drejtat themelore, dhe si e tillë kërkon autorizimin e Presidentit të Republikës.” Edhe pse Këshilli i Ministave të qeverisë e ka miratuar marrëveshjen Rama-Meloni, fatin e saj do ta përcaktojë Gjykata Kushtetuese në 18 janar 2024./DW
E pezulloi sepse e pa kundërshtimin e njerzve dhe gjithashtu Evropa ishte kundër…. Duhet parë rrugë tjetër nga qeveria si ta shkatërrojë vendin.