“Duke pasur parasysh lojën që bëmë, nuk i konkretizuam rastet për të marrë tre-pikëshin. Kjo gjë na dëmton. Penalltia në fund. Bie shtyllë, por nuk kisha parë që të mbyllej loja në këtë farë mënyre”. Arbër Abilaliaj, njeriu i barazimeve duke qenë se sapo ka marrë të gjashtin radhazi, është i pakënaqur me mënyrën si u menaxhua situata e fundit e ndeshjes. Me rezultatin 1-1, Partizani humbi penalltinë e goditur nga Murataj pasi tifozët e Kukësit vërshuan në fushën e lojës, për të protestuar për 11 metërshin e minutës së 98′.
“Zakonisht ne i paracaktojmë tre goditës – sqaroi Abilaliaj -, por nuk mund të goditësh penalltinë në kushte të tilla. Ajo ndikoj te gjendja psikologjike e Valit (Murataj). Njerëzit janë të zgjedhur që më parë, por i vetmi që ishte gati për të goditur ishte Vali”. Abilaliaj sqaroi më pas edhe zëvendësimin e Hadrojit dhe situatën e ndërlikuar fizike të skuadrës: “Ishim të detyruar të zëvendësonim Hadrojn përsëri për një dëmtim. Atanaskoski po luante i dëmtuar dhe kjo na jepte limite në shtyrjen përpara. Edhe Maguette dhe Mehmeti kishin harxhuar shumë energji në pjesën e parë”.
NICA: “NDESHJEN DUHET TA FITONIM NE”
“Jam i kënaqur nga çunat me atë që treguan, pasi ishim të ekuilibruar në të gjitha zonat e fushës. Besoj se loja jonë me pak përvojë dhe nëse do të ishim më të qetë dhe të kujdesshëm, ndeshjen duhet ta fitonim ne”. Stavri Nica, tekniku i Kukësit, ka keqardhjen për një rezultat që me 1-0 e arritur 11 minuta nga fundi mund të ishte administruar ndryshe. “Barazimi ishte shumë i shpejtë dhe kjo erdhi se nuk patëm vëmendjen e duhur. Patëm një rast të pastër që duhet të përfundonte të rrjetë dhe do të zgjidhej ndeshja. Duhet të jesh shumë i kujdesshëm me sulmuesit e Partizanit, pasi me një lëshim mund të shkosh edhe në humbje”.
Lexo më tej: Murataj dënon Partizanin, humb penallti në minutën e 101′: protesta e tifozë në fushë në Kukës
Nica pastaj e thelloi konceptin: “Momenti i përvojës ndikoi te barazimi. Skuadra duhet të shkurtohet shumë që të krijojë ekuilibrin në fushë. Mendoj se euforia pati ndikimin e vet pas kalimit në avantazh. Kemi shumë lojtarë të rinj që luajnë për herë të parë në Superiore. Një mos përqendrim maksimal në këtë kategori, të dëmton në çekuilibrim”.