Ndeshja e nesërme kundër Arsenal mund të jetë pankina e fundit në Champions League me Bayern Munich për Thomas Tuchel. Tekniku gjerman javë më parë njoftoi se do të largohej nga klubi në fund të sezonit. Bavarezët, megjithatë, e nisin me një avantazh të lehtë (2-2 në ndeshjen e parë) dhe do të shesin shtrenjtë jetën për të mos parë të zhduket edhe objektivi i fundit i një sezoni, deri tani, jashtë pritshmërive. “Duhet të japim gjithçka. Kemi nevojë për pasion dhe të njëjtën disiplinë taktike si në ndeshjen e parë. Ne vërtet duam ta fitojmë këtë ndeshje dhe është jashtëzakonisht e rëndësishme që çdo tifoz të vijë të na mbështesë dhe të na inkurajojë – shpjegoi ai në konferencën për shtyp -. Kemi nevojë për atë shtytje shtesë për të mundur Arsenal”.
“Ne kemi një avantazh të vogël nëse merr parasysh përvojën tonë në këtë kompeticion. Por për ta kthyer atë në një avantazh vendimtar, ne kemi nevojë për paraqitje të mirë – shtoi Tuchel -. Ne kemi mundësinë ta bëjmë këtë për të hedhur hapin tjetër të madh në këtë sfidë të mrekullueshme. Jemi gati të vendosim gjithçka në tavolinë”.
Lexo më tej: Video/ 6 gola e spektakël në Bernabeu, Real e City lënë gjithçka për aktin II: Arsenal barazon 2-2 me Bayern
VLERËSIMI PËR KUNDËRSHTARIN
Tuchel ka një respekt të madh për Arsenal. “Ata përpiqen të krijojnë epërsi në të djathtë me Saka dhe Odegaard, por janë shumë fluidë dhe të aftë për të ndryshuar mënyrën e sulmit. E pamë edhe në ndeshjen e tyre të fundit në kampionat. Në ndeshjen e parë luajtëm me shumë kujdes dhe e zgjidhëm mirë situatën, por ishte vetëm pjesa e parë. Në shtëpi duhet të bëjmë gjithçka përsëri si herën e parë – analizoi trajneri gjerman -. Kushdo që thotë se duhet të dalim përpara, e ka gabim sepse injoron faktin që po luajmë kundër Arsenal dhe kemi 50% mundësi për të kaluar. Ne duam të shkojmë përsëri në gjysmëfinale dhe pastaj deri në fund, sepse fitimi i Champions League do ta ëmbëlsonte sezonin. Deri më tani kemi performuar nën pritshmëritë, por nuk nevojitet kjo për t’u motivuar”.