Kroos tërhiqet nga futbolli, nuk rinovon me Real Madrid: ndeshja e fundit në karrierë do të jetë me Gjermaninë

Toni Kroos ka njoftuar tërheqjen e tij nga futbolli i luajtur. Në moshën 34-vjeçare mesfushori gjerman ka vendosur të varë këpucët në gozhdë duke mos rinovuar kontratën me Real Madrid, që e mirëpriti dhjetë vjet më parë. Karriera e tij do të mbyllet me Kampionatin Evropian Gjermani 2024, kompeticionin e fundit në të cilin do të marrë pjesë para se t’i thotë zyrtarisht lamtumirë futbollit. Kjo është edhe dëshira e Kroos: t’i japë fund karrierës me fanellën e Gjermanisë.

Ka qenë vetë lojtari që ka njoftuar vendimin për të mos nënshkruar një marrëveshje të re me Los Blancos dhe për të mos pranuar më oferta nga asnjë ekip. Ish-lojtari i Bayern Munich mbërriti në Spanjë në vitin 2014, duke u shndërruar menjëherë në një nga mesfushorët më të mirë në botë. Kroos ishte një pikë kyçe për Real dhe gjithashtu për ekipin e tij kombëtar, të cilin do ta përshëndesë në kampionatin evropian të zhvilluar në shtëpi këtë verë.

Lexo më tej: Kroos, gjeniu i asisteve që fsheh një sekret: një video zbulon si i ndihmon gjermani shokët e tij

Pas zërave që qarkulluan në mëngjes, Real Madrid vendosi të zyrtarizojë lajmin me një deklaratë ku nënvizonte dëshirën e Kroos për t’u larguar nga skena: “Real Madrid njofton se Toni Kroos ka vendosur t’i japë fund karrierës së tij si futbollist profesionist pas Euro 2024″. Nuk do të ketë asnjë aventurë të re për gjermanin, ndonëse ai është ende në moshë për të nënshkruar një kontratë të re dhe për të zgjatur edhe për disa vite karrierën e tij futbollistike.