“Foshnja lindi e vdekur”. Rama akuza skemës e arbitrit Taylor, Shehi: “Qajmë rastet e humbura”

“Padiskutim i mërzitur sepse është një vit punë e mund dhe sigurisht që nuk të vjen mirë të humbasësh, sidomos me këtë format. Uroj Egnatian se nuk vodhi gjë, i uroj sukses, i përgëzoj për punën. Por “foshnja lindi e vdekur” si i thonë se ky eksperimenti i “Final Four” na shkatërroi nga nervat me pjesën që duhej të motivonim lojtarët. E pastaj erdhi një arbitër që na solli jo vetëm shiun nga Londra, por kishte ardhur me pushime dhe vetë u mërzit”. Këto janë fjalët e Drejtorit të përgjithshëm të Partizanit, Olsi Rama, që shkoi rëndë me fjalët ndaj skemës së FSHF-së dhe arbitrit anglez të ndeshjes me Egnatian.

“Nuk e komplimentova se nuk kishte gjë për të komplimentuar – tha Rama -. E kam ndjekur dhe e di se çfarë qëndrimi ka me mënyrën si arbitron dhe kur vjen në Shqipëri vjen e na tregon si luhet futbolli. Partizani e Egnatia nuk janë City e Liverpooli Por kur jepen 7 minuta shtesë kur loja është vonuar në mënyrë sistematike që në pjesën e parë dhe nuk i tërhiqet asnjë herë vëmendje portierit, rrëzohen e hyn mjeku, ka ndërrime e nuk luhet asnjë minuet ekstra, mua më duket pak e dëmshme për futbollin”.

“Mbase kishte ardhur për pushime e nuk donte të bënte 30 minuta të tjera – vazhdoi Rama -. E tha më mirë po e mbyll këtu se ai siç erdhi edhe do të iki. Ka ngrënë një drekë të mirë dhe shkon i qetë në Londër se nuk e vret as ndërgjegjja. Ndërkohë është mundi ynë dhe ato minuat ekstra, mbase nuk bënim gol, por të paktën do të ishte një ndeshje pak më e ndershme”, e mbylli sulmin e tij Rama.

SHEHI: “MBETET VETËM TË QAJMË RASTET E HUMBURA”

“Mërzitja është prezente, po të kishim shënuar do të qe histori tjetër. Rastet i kishim, po të kishim shënuar do kishte shkuar ndryshe. Presioni në ndeshje të tilla është i madh, ndoshta ndikoi te lojtarë. Nuk kam pishmane. Episodet e vendosën, kështu ndodhi edhe sot, një episod na ndëshkoi”. Orges Shehi ka parë titullin e dytë radhazi ti shkasë nga duart në ditën e fundit. Pas atij të humbur me Tiranën sezonin e kaluar, fituar nga Partizani që ai tani drejton, tani sheh Egnatian të festojë në Arena Kombëtare.

Lexo më tej: “Ikën braziliani”, “kush ju tha që ikën”: Tetova e Demrozi ngatërrohen për Fernandon

Shehi pastaj vazhdoi: “Nuk na mbetet gjë tjetër vetëm të qajmë rastet e humbura. Ky është futbolli. Egnatia u përshtat më shumë me terenin në pjesën e parë. E zhvendosi lojën me topat e gjate. Kundërshtari i shfrytëzoi rastet ndërsa ne jo. Këtë kohë që jemi pushim do të jemi të mërzitur, më vjen keq për çunat dhe tifozët që dhanë maksimumin”.