Mitsotakis: Duam që Shqipëria t’i afrohet BE, duke iu përmbajtur angazhimeve europiane

Kryeministri grek Kyriakos Mitsotakis priti sot në Athinë Fredi Belerin, eurodeputetin e zgjedhur të Demokracisë së Re, i cili është nisur drejt Strasburgut për të kryer betimin pas lejes së marrë nga autoritetet shqiptare.

Mitsotakis deklaroi se Greqia ka arsyet për të kërkuar një Shqipëri që i afrohet BE-së, por që i përmbahet angazhimeve të saj europiane.

“Ne kemi të gjitha arsyet për të kërkuar një Shqipëri që bën progres në këto çështje, që i afrohet Evropës, por që i përmbahet rreptësisht angazhimeve të saj evropiane. Mendoj se ky është një qëllim i përbashkët për të cilin ne të gjithë duam të punojmë.” – u shpreh Mitsotakis, ndërsa tha se shpreson për daljen përfundimtare nga burgu të Belerit.

“Shpresoj që shumë shpejt të dilni përgjithmonë nga burgu, që ky kapitull i dhimbshëm të mbyllet për të gjithë ne, që të ecim përpara, të shohim përpara”, tha Mitsotakis duke iu drejtuar Belerit.

“Konsideroj se sundimi i ligjit, e drejta për të zgjedhur dhe për të qenë i zgjedhur nuk janë të vetëkuptueshme në vendin ku jetoj. Dua t’i ndihmoj ”, tha Beleri sipas medias greke Kathimerini.

Lexo më tej: Beleri në qeli/ Rama përballë Brukselit për betimin e eurodeputetit 

Mëngjesin e sotëm Fredis Beleri kaloi portat e burgut të Fierit pasi siguroi lejen pesëditore që kishte kërkuar për të shkuar në Strasburg për t’u betuar si deputet i Parlamentit Europian.

Dialogu mes Mitsotakis dhe Belerit:

Mitsotakis: Kam shumë arsye, i dashur Fredi, të jem i lumtur t’ju mirëpres sot në Megaro Maximos. Së pari, më lejoni t’ju përgëzoj për zgjedhjen tuaj si eurodeputet grek tani, në Bruksel dhe Strasburg, me Demokracinë e Re. Jam i sigurt se do t’i përmbushni plotësisht detyrat tuaja.

Më lejoni t’ju them se sa i lumtur jam që kjo aventurë e madhe duket se po i vjen fundi. Është e vetëkuptueshme, ju keni marrë licencën që të mund të ushtronit detyrat tuaja dhe të bënit betimin. Shpresoj që shumë shpejt të dilni përgjithmonë nga burgu, që ky kapitull i dhimbshëm të mbyllet për të gjithë ne, që të vazhdojmë përpara, të shohim përpara.

Beleri: Do të doja t’ju falënderoja personalisht që më keni mbështetur gjatë gjithë kësaj kohe. Unë do të nderoj besimin që më keni dhënë duke më futur në fletën e votimit europian. Mendoj se në shtetin ku jetoj nuk është e vetëkuptueshme shteti ligjor, e drejta për të zgjedhur dhe për t’u zgjedhur. Unë dua t’i ndihmoj ata. Të ndihmojë pakicën kombëtare greke të qëndrojë në shtëpitë stërgjyshore, por edhe që ky shtet të afrohet dhe të bëhet anëtar i familjes europiane.

Mitsotakis: Kjo është ajo që duam edhe ne, dhe ju duhet ta dini – përveç kësaj, unë mendoj se e kam vërtetuar këtë në praktikë – se unë qëndroj pranë njerëzve të pakicës kombëtare greke. Ne kemi të gjitha arsyet për të kërkuar një Shqipëri që bën progres në këto çështje, që i afrohet Evropës, por që i përmbahet rreptësisht angazhimeve të saj evropiane. Mendoj se ky është një qëllim i përbashkët për të cilin ne të gjithë duam të punojmë.