Mjeku Edmond Gashi ka mbërritur në SPAK, ku në orën 11:00 pritet t’i komunikohet masa e sigurisë. Gashi ishte i shoqëruar nga një avokat kur hyri në gjykatën e posaçme. Sot pritet të shqyrtohen masat e sigurisë për 7 mjekët dhe infermierët e spitalit Onkologjik.
Kujtojmë se mjeku Gashi, nuk u ofronte shërbim pacientëve të prekur me tumor në spitalin Onkologjik, por i dërgonte në klinikën e tij private. Sipas hetimeve, Edmond Gashi, nuk u ka treguar në asnjë rast pacientëve të klinikës së tij se aty mund të bënin vetëm skanerat dhe operimet, ndërsa për biopsinë, kimioterapinë apo rrezet për të kuruar pacientët do të duhet të riktheheshin sërish në spitalin shtetëror.
Përveç mashtrimit për t’u zhvatur para pacientëve të tij, mjeku onkolog Edmond Gashi, i mbante kartelat e pacientëve në zyrën e tij duke thyer rregullat e spitalit që parashikon që të lihen në kartotekat e kirurgjisë. Kjo bëhej në mënyrë që ai të kalonte pacientët te klinika e tij private dhe që të mos ndiqeshin nga mjekë të tjerë.
Gjithashtu në ambientet e SPAK ka mbërritur farmacisti Florian Marku dhe Alketa Pere të përfshirë në skandalin e Onkologjikut.