Ukraina ka shkatërruar një urë të rëndësishme strategjike mbi lumin Seym, teksa vazhdon inkursionin e saj në rajonin Kursk të Rusisë. Zyrtarët rusë citohen të kenë thënë se operacioni pranë qytetit të Glushkovo ka bllokuar një pjesë të zonës. Ura u përdor nga Kremlini për të furnizuar trupat e tij dhe shkatërrimi i saj mund të pengojë tashmë lëvizjet e tyre.
Presidenti Volodymyr Zelensky tha se trupat ukrainase po forconin pozicionet e tyre në Kursk dhe i quajti territoret e pushtuara një fond shkëmbimi, duke lënë të kuptohet se ato mund të shkëmbeheshin me rajonet ukrainase të pushtuara nga Moska. Në javën e tij të dytë, ky është inkursioni më i thellë i Ukrainës në Rusi që kur Moska filloi pushtimin e saj në shkallë të plotë më shumë se dy vjet më parë. Operacioni i befasishëm ndërkufitar i Ukrainës ka çuar në evakuimin e me shumë se 120 mijë njerëzve. Mes pretendimeve ukrainase për përfitime territoriale, Kievi ka pohuar vazhdimisht se nuk dëshiron të pushtojë Rusinë.
“Ukraina nuk është e interesuar të pushtojë territoret ruse”, – tha të premten një ndihmës i lartë i presidentit ukrainas Zelensky. Mykhailo Podolyak tha se një nga objektivat kryesore që ata donin nga inkursioni i tyre në Rusi ishte të bënin Moskën të negocionte “me kushtet tona”. “Në rajonin e Kurskut, ne mund të shohim qartë se si mjeti ushtarak po përdoret për të bindur Rusinë që të hyjë në një proces të drejtë negocimi,” shkroi ai në X, duke shtuar se Kievi ka provuar “mjete efektive të detyrimit”.
Kreu i ushtrisë ukrainase, Oleksandr Syrsky, tha të premten se ofensiva kishte bërë përparim të mëtejshëm. “Trupat e grupit sulmues vazhdojnë të luftojnë dhe kanë avancuar në disa zona nga një deri në tre kilometra drejt armikut”, i tha ai presidentit Zelensky në një video të postuar në mediat sociale. Syrsky tha se shpresonte të merrte “shumë të burgosur” nga një betejë në fshatin Mala Loknya, rreth 13 km nga kufiri. Teksa përparimi i Ukrainës vazhdon, zyrtarët në rajonin rus të Belgorodit në kufi me Ukrainën kanë thënë se do të evakuojnë 5 fshatra duke filluar nga e hëna.
“Nga 19 gushti, ne po mbyllim hyrjen në 5 vendbanime, duke hequr banorët dhe duke i ndihmuar ata të largojnë pronat e tyre” – shkroi guvernatori i Belgorodit Vyacheslav Gladkov në aplikacionin e mesazheve sociale Telegram, duke përmendur fshatrat e vegjël pranë kufirit. Megjithatë, teksa Ukraina lëviz më tej në territorin perëndimor rus, forcat ruse po përparojnë në lindje të Ukrainës.
Të premten, Moska tha se trupat e saj kishin kapur Serhiivka, e fundit në një varg qytetesh të pretenduara nga trupat ruse në javët e fundit. Përparimet e fundit i sjell rusët më afër qytetit të Pokrovsk, një qendër jetike logjistike që ndodhet në një rrugë kryesore për furnizimet për trupat ukrainase përgjatë frontit lindor.
Pokrovsk shtrihet në veri-perëndim të rajonit të Donetskut të kontrolluar nga Rusia, i cili ka qenë nën zjarrin ukrainas që nga mëngjesi i së premtes, duke lënë disa civilë të plagosur. Një mesazh nga kreu i administratës ushtarake të qytetit, Sergiy Dobryak u kërkoi njerëzve të evakuoheshin pasi Rusia “po i afrohej me shpejtësi periferisë”. Më herët, zyrtarët e instaluar nga Rusia në pjesën e kontrolluar nga Moska të rajonit Donetsk të Ukrainës fajësuan Kievin për një sulm në një qendër tregtare që plagosi të paktën 7 persona.
Sipas guvernatorit të mbështetur nga Rusia të Republikës së vetëshpallur Popullore të Donetskut, Denis Pushilin, qyteti ka qenë nën bombardime që nga mesdita e së premtes. Agjencia e lajmeve Reuters raportoi se gjatë 24 orëve të fundit, 3 civilë ishin vrarë dhe 5 të tjerë u plagosën. Në Krime, e cila u aneksua nga Rusia në vitin 2014, raketat që synonin një urë të ndërtuar nën urdhrat e presidentit rus Vladimir Putin u rrëzuan brenda natës, tha ministria e mbrojtjes në Telegram. Kievi ka nisur sulme të shumta dhe tentativa për sulme në urën e Kerçit që kur Moska filloi ofensivën e saj ushtarake. ©BBC, LAPSI.al