Një ish-ndihmëse e dy guvernatorëve të Nju Jorkut u akuzua të martën se kishte vepruar si agjente e paligjshme e qeverisë kineze. Ajo kishte përdorur pozicionin e saj për të shtyrë përpara në mënyrë delikate axhendën e Pekinit, në këmbim të përfitimeve financiare me vlerë miliona dollarë.
Linda Sun, e cila kishte qenë zv.shefe e shtabit të guvernatores Kathy Hochul dhe zv.oficere e diversitetit për ish-guvernatorin Andrew Cuomo, u arrestua të martën në mëngjes së bashku me bashkëshortin e saj, Chris Hu, me 4 milionë dollarë në shtëpinë e tyre në Long Island.
Prokurorët federalë thanë se Sun, me kërkesë të zyrtarëve kinezë, bllokoi përfaqësuesit e qeverisë tajvaneze nga aksesi në zyrën e guvernatores dhe u dha formë mesazheve zyrtare të Nju Jorkut për t’u afruar me prioritetet e qeverisë kineze. Në këmbim, burri i saj mori ndihmë për aktivitetet e tij të biznesit në Kinë, një nxitje financiare që prokurorët thanë se i mundësoi çiftit të blinte pronën e tyre shumë milionëshe në Manhasset, Nju Jork, një godinë në Hawaii për 1.9 milionë dollarë dhe makina luksoze, duke përfshirë një Ferrari të vitit 2024, thuhet në aktakuzë.
Sun mori gjithashtu edhe dhurata më të vogla duke përfshirë bileta për shfaqjet e një orkestre dhe grupe baleti kineze. Nëse janë të vërteta, akuzat tregojnë se autoritetet kineze ishin në gjendje të fitonin ndikim në nivelet më të larta të qeverisë shtetërore në Nju Jork për gati një dekadë.
Sun dhe Hu u deklaruan të pafajshëm gjatë një paraqitjeje fillestare në gjykatë të martën pasdite në Brooklyn dhe do të lirohen me detyrim paraqitje. Sun i është ndaluar të ketë kontakte me konsullatën dhe misionin e Republikës Popullore të Kinës. Rasti është pjesë e një përpjekjeje të gjerë të
Departamentit të Drejtësisë për të çrrënjosur agjentët sekretë të qeverisë kineze që veprojnë në Shtetet e Bashkuara. Vitet e fundit, autoritetet federale kanë akuzuar shtetasit kinezë jo vetëm për avancimin e fshehtë të interesave të Pekinit, por edhe për ngacmimin dhe frikësimin e disidentëve në emër të qeverisë.
Vitin e kaluar, Departamenti i Drejtësisë akuzoi një grup burrash për krijimin e një stacioni sekret policie në qytetin e Nju Jorkut që vepronin nën drejtimin dhe kontrollin e qeverisë kineze. Sun, një shtetase amerikane e natyralizuar e lindur në Kinë, ka punuar në qeverinë amerikane për rreth 15 vjet, duke punuar në administratën e Cuomo dhe së fundmi duke u bërë zv.shefe e stafit të Hochul.
Në nëntor 2022, Sun mori një punë në Departamentin e Punës të Nju Jorkut, si zv.komisionere për zhvillimin strategjik të biznesit, por ajo u largua nga ajo punë muaj më vonë në mars 2023. Në një deklaratë, një zëdhënës i zyrës së Hochul tha se administrata e pushoi Sun pasi “zbuloi prova të sjelljes së saj të keqe”. ©LAPSI.al