Kate Middleton ka konfirmuar së fundmi se ka mbaruar trajtimin kundër kancerit. Përmes një deklarate në llogarinë zyrtare në X, ajo u shpreh:
“Ndërsa vera përfundon, nuk mund t’jua them se sa e çliruar ndihem që kam përfunduar trajtimin e kimioterapisë. Nëntë muajt e fundit kanë qenë të vështira për familjen tonë. Jeta mund të ndryshojë në një moment dhe ti duhet të gjesh një mënyrë për të tejkaluar stuhitë dhe rrugët e panjohura. Rrugëtimi i kancerit është i ndërlikuar, i frikshëm dhe i paparashikueshëm për të gjithë, veçanërisht për ata që janë pranë teje”.
Më tej, në një video ku shfaqet Kate me familjen e saj, ajo shton:
“Po pres që të rikthehem në punë dhe të bëj edhe disa detyra publike për muajt e ardhshëm, kur të mundem”, duke konfirmuar kështu rikthimin në detyrat mbretërore.
Kate ndau një video të para-regjistruar më 22 mars, në të cilën ajo zbuloi problemet e saj shëndetësore në botë. Familja mbretërore tha se mjekët e zbuluan kancerin e saj gjatë një operacioni të planifikuar abdominal në janar dhe vuri në dukje se ajo tani është në fazat e hershme të kryerjes së “një kursi të kimioterapisë parandaluese”.